Во Франција четврта ноќ по ред избувнаа насилни протести. Во неколку француски градови, особено во Марсеј каде беа уапсени 87 лица, евидентирано е ново насилство.
Министерот за внатрешни работи Жералд Дарманин истакна дека се приведени деца на возраст од 13 години, додавајќи дека просечната возраст на уапсените е 17 години, објави Си Ен Ен.
Синоќа, според досега објавените податоци, уапсени се 994 лица, а повредени се 79 полицајци. Француските медиуми јавуваат дека 19-годишно момче доцна синоќа паднало од покривот на супермаркет во Руан, а подоцна починало в болница. Се уште не е потврдено дали бил дел од протестот.
На улиците на Франција се испратени околу 45.000 полицајци, повеќе од претходната ноќ, а забележани се и оклопни транспортери. Владата побара од регионалните власти да ги прекинат ноќните автобуски и трамвајски линии.
Немирите започнаа во вторникот, откако полицијата застрела и уби 17-годишно момче од алжирско потекло, по име Нахел М. Полицаецот кој го застрела Нахел му се извини на семејството, но смртта на тинејџерот го разгоре незадоволството поради полициското однесување и расното профилирање во француските предградија.
Француските медиуми јавуваат дека 19-годишен маж доцна синоќа паднал од покривот на супермаркет во Руан, а подоцна починал во болница. Се уште не е потврдено дали бил дел од протестот.
Демонстрантите палат згради, и возила, а ограбиле и продавница за оружје во центарот на Марсеј, при што украле неколку ловечки пушки, но без муниција, соопшти полицијата. Едно лице е уапсено со пушка најверојатно од продавницата, соопшти полицијата која сега го обезбедува објектот. Во Марсеј, исто така, била запалена и книжарница.
Запрашан во синоќешниот главен телевизиски дневник на TF1 дали владата може да прогласи вонредна состојба, министерот Дарманин изјави дека не се исклучува ниту една хипотеза и за тоа ќе одлучи претседателот на државата.
Насилствата го втурнаа претседателот Емануел Макрон во најтешката криза за време на неговото лидерство од протестите на жолтите елеци кои започнаа во 2018 година. Последните немирите се разгореа низ целата земја, вклучително и во градовите Париз, Марсеј, Лион, Тулуз, Стразбур и Лил.
Вака изгледаше синоќа во Париз:
Г. Т.
