Турканици, нервози, пцуење, колнење, запознавање, шмекање… се на едно место пред пунктовите за издавадење на нови лични документи со придавката Северна. Наши извори од МВР, кои сакаат да останат анонимни, велат дека оваа навидум хаотична ситуација со вадењето на нови лични карти и пасоши, всушност е ПР стратегија за граѓаните да не се отселат од државата.
„Имаме дојава дека оваа година е клучна, односно, ако не направиме нешто да ги задржиме граѓаните во нашата земја, особено младите, дека по изборите ќе ни се отселат од државата. Затоа решивме да создадеме т.н. контролиран хаос, за младите да можат да останат тука да работат, да творат, да се развиваат, да се размножуваат…“.
Нашиот извор додава и дека ова е уште една добра прилика да се развива домашниот (селски) туризам, со тоа што граѓаните кога ќе немаат можност да излезат од државата, ќе бидат приморани да ги запознаат убавините на нашата мила и напатена Македонија, додуша веќе Северна Македонија.
„Ви текнува кога беше пандемијата и кога имавме карантин, кога се беше затворено и блокирано? Токму во тој период граѓаните шетаа и ги запознаваа природните убавини на нашата земја. Многу наши граѓан(к)и ги посетуваат Париз, Милано, Дубаи… а не знаат како изгледа Берово, Могила, Матка, Кратово… Па нели тоа е патриотизам“?!
Тој додава дека се размислува да се даваат ваучери за годишни одмори како за време на пандемијата со Ковид-19, за сите што не сакаат или не успеале да ги сменат документите.
„На тој начин сите ќе бидат задоволни, ‘и волкот сит и овците на број’, хахах“, вели тој.
На прашањето како ќе ги коментира оние замаени граѓани кои се уште им веруваат на ВМРО-ДПМНЕ и Левица дека џабе ќе вадат нови лични карти со Северна, кога наскоро ќе се врати старото име, само Македонија, тој се насмевна и рече „добро е што има и такви за да има помала гужва на пунктовите“, и додаде дека кога-тогаш ќе мора и тие да станат „северни“.
Северџан Македонски
Оградување, одбрана и заштита: Ова е козерија. Секоја сличност на овој текст со реалноста е (не)намерна.
