Лидерите на СДСМ и ВМРО ДПМНЕ со меѓусебни обвинувања на ТВ дуел, анкетата на „Брима“ денес главна точка на партиските препукувања меѓу СДСМ и ВМРО-ДПМНЕ, ДУИ го промовираше изборниот слоган, Алијансата за Албанците излезе со нови обвинувања на пресот од седиштето во Тетово. Државната изборна комисија (ДИК) ги објави верификуваните кандидатури за градоначалници и советници.
ТВ ДУЕЛ
Лидерите на владејачката СДСМ, Зоран Заев и на опозициската ВМРО- ДПМНЕ, Христијан Мицкоски, на вечерниот ТВ ДУЕЛ на Канал 5 си разменија низа обвинувања за состојбата во земјата. Заев изјави дека заврши времето кога од ВМРО-ДПМНЕ беа и извршители и судии и обвинители, додека Мицкоски, освен морална, побара и кривична и политичка одговорност.
И премиерот Зоран Заев и претседателот на ВМРО-ДПМНЕ Христијан Мицкоски вечерва изјавија дека очекуваат да победат со своите коалиции на претстојните локални избори.
-Ние ќе победиме и на градоначалничките места, во вкупен број, и во вкупен број на советничките места во државата, и во вкупен број на гласови, а ќе победиме и во градот Скопје. Затоа што сме Влада која помогнала на општините и искрено верува во општините, рече Заев на вечерашниот ТВ дуел.
Мицкоски, пак, истакна дека победата на опозицијата на овие локални избори не е доведена под знак прашање. ВМРО-ДПМНЕ, според него, ќе освои поголоем број градоначалници од СДСМ и повеќе гласови и на советнички листи, а коалицијата со Села и Гаши, како што додаде, е коалиција против корупција.
РЕАКЦИИ ЗА АНКЕТАТА НА БРИМА
СДСМ и ВМРО-ДПМНЕ повторно ги вкрстија копјата и излегоа со дијаметрално спротивставени видувања за објавените резултати од анкетата на Брима, во низа партиски реакции и меѓусебни обвинувања.
ОБЈАВЕНИ КАНДИДАТУРИ
Државната изборна комисија (ДИК) потврдени 303 листи за градоначалници и 567 за советници, Има отфрлени две листи за градоначалници, по една во Охрид и Струга и шест за советници во Врапчиште, Ѓорче Петров, Зелениково, Кичево, Струга и Тетово.
ДИК утре на јавна седница во 15 часот ќе ја спроведе жрепката за политичко рекламирање за распределба на локации за рекламни паноа и билборди согласно критериумите од Изборниот законик.
ПРЕС КОНФЕРЕНЦИЈА
Алијанса на Албанците на прес конференција од партиското седиште во Тетово, изнесе низа обвинувања за последните случувања во Тетово, и повторно побара одговорност од власта.
РОКОВНИК
Сите поважни рокови до крајот на изборниот процес на едно место се собрани во роковникот што го објави и ЦИВИЛ. Роковникот содржи податоци за тоа кога најдоцна треба да се поднесуваат кандидатските листи, финансиските и други извештаи, кога се гласа, кои се роковите за објавување на резултатите од изборите и многу други фази, настани и активности во текот на изборниот процес.
МОНИТОРИНГ
ИЗБОРЕН МОНИТОРИНГ Во тек е повикот за краткорочни изборни набљудувачи на ЦИВИЛ. Заинтересираните можат да се пријавуваат по пат на едноставна онлајн апликација до 30 септември. На медиумската платформа на организацијата достапни се и одговори на најчесто поставуваните прашања. Во овој период се спроведува и долгорочен изборен мониторинг, кој беше интензивиран од 15 август.
ГРАЃАНСКА ПРИЈАВА ЦИВИЛ спроведува и долгорочен мониторинг на дезинформациите и говорот на омразата. Како и во низа други области, тоа се прави во блиска соработка со граѓанките и граѓаните. Меѓу другото, достапна е и Граѓанската пријава на која може да се пријавуваат случаи на дезинформации и говор на омраза, но и кршење на човековите права, корупција, дискриминација и низа други негативни појави во општеството.
ПРИЈАВА НА ИЗБОРНИ НЕРЕГУЛАРНОСТИ За време на изборниот процес, на располагање е и веб страницата Слободни избори со онлајн формулар за пријава на изборни нерегуларности.
ПОТСЕТНИК: ЦИВИЛ ГИ ПОВИКА СИТЕ ПОЛИТИЧКИ ПАРТИИ И НЕЗАВИСНИ КАНДИДАТИ ДА ЈА ИСПРАЌААТ ИНФОРМАЦИИ ЗА АКТИВНОСТИТЕ
Во рамките на својот долгорочен изборен мониторинг, ЦИВИЛ и Редакцијата при медиумската платформа, редовно ги бележат настаните на различните учесници во изборната трка. Организацијата неодамна ги повика политичките партии и независните кандидати редовно да ја известуваат организацијата и нејзината медиумска платформа за своите активности. Дел од учесниците во изборната трка сè уште не одговорија на повикот.
Д.Мишев
