Илјадници луѓе во четвртокот излегоа на улиците на поголемите градови во Словачка за повторно да протестираат против плановите на новата влада на премиерот Роберт Фицо за измена на кривичниот законик на земјата, објави Асошиејтед прес.
Толпата демонстранти постојано извикуваше пароли „Мафија, мафија“ и „Доста е Фичо“. Околу 20.000 демонстранти дојдоа на централниот плоштад во Братислава. Се забележува дека од првиот антивладин протест на 7 декември во Братислава, демонстрациите се проширија во 19 словачки градови.
Измените предложени од трипартиската коалициска влада вклучуваат укинување на специјалното обвинителство кое се занимава со тешки кривични дела, вклучително и поткуп, организиран криминал и екстремизам. Наместо тоа, ваквите случаи би ги истражувале регионалните обвинители, кои 20 години не се занимаваат со такви кривични дела.
Законодавството усвоено од владата на Фицо бара одобрение од парламентот и од претседателот, но трипартиската коалиција го има мнозинството за да го надмине очекуваното вето од претседателката Зузана Чапутова.
Чапутова рече дека исто така е подготвена да користи уставно оспорување на законодавството. Сепак, нејасно е како Уставниот суд ќе може да донесе одлука, се вели во написот.
Како што е соопштено, последниот митинг во поголемите градови на Словачка против плановите на владата на Фицо за измена на кривичниот законик на земјата се одржа на 20 декември.
Кон крајот на октомври, новиот премиер на Словачка, Роберт Фицо, објави дека неговата влада ја прекинува воената помош за Украина. Во исто време, Словачка вети дека ќе продолжи да испраќа хуманитарна помош за Украина.
Подготви: Д. Мишев
