Иницијативата „За заедничка Македонија“, со поддршка на владејачката структура, повикува од денеска да ѝ се приклучат и студентите.
„Иднината е во младите, а ние младите кажуваме НЕ за Тиранската платформа. Сите студенти заедно да си ја зачуваме унитарноста на нашата татковина“, стои во повикот објавен на социјалните мрежи, креиран од фан- страницата „Студентите за Македонија“.
Фан-страницата е нова, креирана е пред само два дена, на 27 февруари.
Во студентските домови „Кузман Јосифовски Питу“ и „Пелагонија“, во текот на вчерашниот ден, од врата на врата,на студентите им се делеле материјали што повикуваат на поддршка на протестите против двојазичност.
На социјалните мрежи се објавуваат СМС-пораки со кои и од Унијата на млади сили на ВМРО-ДПМЕ ги мобилизира студентите да се појават на денешниот протест.
Иако во повикот за поддршка на иницијативата „За заедничка Македонија“ се вели дека протестите се студентски, и непартиски, очигледно е дека тие имаат поддршка од високите функционери на ВМРО-ДПМНЕ. Денеска, на социјалните мрежи пратеникот од ВМРО-ДПМНЕ Антонио Милошоски, објави фотографија на македонски знамиња што се веат од студентскиот дом „Кузман Јосифоски – Питу“, со легенда: „Студентите од Македонија, под знамето на Македонија!“
Како што е наведено на Фејсбук настанот и во дел од СМС пораките, студентите се повикуваат во 15 часот да излезат пред „Пелагонија“, или пред домот „Гоце Делчев“, од каде што ќе се упатат кон студентскиот дом „Кузман Јосифоски Питу“.
