На езерото Младост кај Велес изградено е инклузивно игралиште со две тактилни патеки и реквизити, во рамки на проектот проект „Инклузивен Смарт Туризам“, што се промовира денеска од страна на Центарот за развој на Вардарски плански регион и Општина Велес.
Целта на новиот проект е подобрување на пристапноста и развој на инклузивноста преку воведување нови рекреативни содржини и услуги и нивно интегрирање со постојните содржини во туристичката атракција езеро Младост да се овозможи еднаков пристап за сите домашни и странски посетители, информираат носителите на проектот.
„Главната активност на проектот е инклузивното игралиште „Парк на срцата“, со две тактилни патеки и реквизити, соодветни на потребите на сите посетители, вклучително посетителите со ограничена мобилност и попречености. Исто така , дополнителна активност се и реквизити за обезбедување на пристап до плажа и пристап до вода за посетителите со ограничена мобилност“, соопштија носителите на проектот.
Со ова, според нив, не само што се овозможува рекреација на децата и лицата со попречености и нивна максимална инклузија со можност за дружење и игри без разлики, туку се придонесува за здравјето и благосостојба на сите домашни и странски посетители. Ова долгорочно ќе придонесе за препознавање на нашата држава како земја на инклузивен туризам и можност за одмор и рекреација за сите. Со овој проект, лицата со посебни потреби добиваат можност да се вклучат целосно во содржините на езерото и самиот парк, кој, покрај лица со посебни потреби, ќе може да го користат и други деца, со цел нивно заедничко дружење, запознавање односно постигнување на главната цел за меѓусебна интеграција.
Инклузивното игралиште „Парк на Срцата“ особено значење дава на подигнување на свеста на граѓаните како и на испраќање на пораката дека и лицата со попречености треба да добијат можност да бидат еднакви и да го добијат правото да функционираат во општеството како и останатите граѓани.
Проектот е финансиски поддржан од проектот „Одржлив и инклузивен рамномерен регионален развој“, спроведен од страна на Швајцарска Агенција за развој и соработка и Министерството за локална самоуправа.