„Не сум во државата, на одмор сум. Кога ќе се вратам, ќе ви одговорам на прашањето“, кратко искоментира Трајан Петровски, надлежен за односи со јавност во Општина Гази Баба, на прашањето на ЦИВИЛ Медиа: зошто сѐ уште стои огромен пропаганден постер на Никола Тодоров, поставен на зграда во близина на плоштадот во Автокоманда.
Претходно, телефонски разговаравме и со други претставнички од општината, меѓутоа, или не знаеја или не беа надлежни да ни одговорат на прашањето.
Предвремените парламентарни избори, се одржаа пред повеќе од половина година, на 11 декември 2016 година. Според членот 185 од Изборниот законик, доколку организаторот не го отстрани сметот од плакатите во рок од 30 дена по завршување на изборите, се изрекува глоба во износ од 500 – 2.000 евра.
ЦИВИЛ Медиа се обрати писмено и до партијата ВМРО-ДПМНЕ, но до објавување на текстот не добивме никаков одговор.
Ниту Државната изборна комисија не одговори на прашањата што им ги испративме на електронска пошта.
Откако лидерот на СДСМ, Зоран Заев формираше нова влада, Никола Тодоров даде оставка од пратеничкото место, бидејќи, како што истакна – ќе се посветел на адвокатската кариера.
Но, Тодоров присуствуваше на вчерашната средба со еврокомесарот Јоханес Хан, на која беа лидерот на ВМРО – ДПМНЕ, Никола Груевски и Антонио Милошевски.
Дехран Муратов