Две недели по скандалот со суспензијата на средствата од ИПАРД програмата, СДСМ обвинува дека министерот за земјоделство Цветан Трипуновски не дава одговори на клучните прашања поврзани со причините, роковите и последиците од блокадата на европските фондови. На прес-конференција, портпаролката Богданка Кузеска објави дека министерството испратило само општи законски рамки и цитати од регулативи, без ниту една конкретна информација.
„Нема збор за причините, нема рокови, нема план. Едно големо ништо“, изјави Кузеска, оценувајќи дека таквиот одговор е навреда за илјадници земјоделци, 3.000 нови бизниси и потенцијални 10.000 работни места кои директно зависат од ИПАРД-поддршката.
Според СДСМ, суспензијата на над 130 милиони евра не е административна формалност, туку сериозен удар врз компании и индивидуални производители кои веќе вложиле средства и се задолжиле.
„Овие луѓе имаат право да знаат до кога ќе трае суспензијата и кој ќе ја покрие штетата“, порача партијата.
Кузеска повтори дека министер кој јавно тврди дека не чувствува одговорност „нема кредибилитет да биде на чело на ресорот“ и додаде дека избегнувањето на медиумски настапи и пратенички прашања е доказ дека „нема какви аргументи да понуди“.
СДСМ најави дека нема да отстапи од барањата за целосни и транспарентни одговори, како и за политичка одговорност.
Реакција од Владата: „Нема прикривање, институциите се транспарентни“
Владата ги отфрли ваквите обвинувања како неосновани. Портпаролката Марија Митева изјави дека нема скриени информации и дека институциите работат согласно процедурите.
„Апсолутно го отфрлам тврдењето дека се крие нешто. Максимално сме транспарентни“, рече Митева, додавајќи дека Министерството за земјоделство и другите надлежни органи – вклучително и судските – ќе ги соопштат сите релевантни податоци.
Средствата од ИПАРД 3 програмата (2021–2027) се привремено суспендирани поради сомнежи околу работењето на Агенцијата за финансиска поддршка во земјоделството и руралниот развој. Како превентивна мерка, исплатите се стопирани се додека не се завршат проверките.
