Руските товарни бродови ги исклучуваат своите сигнали и мешаат украдено жито со неукрадено за да го поматат неговото потекло, според истрагата на Bellingcat во соработка со американските медиуми Scripps News и Lloyd’s List.
Претходните истраги открија дека Русија систематски крадела жито од окупираните територии на Украина. Последната приказна на Bellingcat и нејзините партнери покажува како оваа шверцерска операција станала пософистицирана со текот на времето.
Според истрагата, флотите од „бродови духови“ ги исклучуваат нивните системи за автоматска идентификација (AIS), широко користени за следење на поморската трговија, додека го напуштаат пристаништето Севастопол на Крим окупиран од Русија. Експертите за санкции цитирани во приказната велат дека оневозможувањето на AIS без легитимна причина се смета за измамничка практика и е вообичаена тактика за избегнувачите на санкции.
Со усогласување на јавните фотографии со сателитски снимки, Bellingcat и неговите партнери идентификуваа четири брода што Русија ги натовари со украдено жито на терминалот за жито Алвита во Севастопол, кој е под санкции на Соединетите Американски Држави и Европската Унија.
Соединувајќи ги сателитските снимки и податоците од AIS, истрагата ги пронајде двата брода, натоварени со украинско жито, сè до пристаништето Бандар Хомеини во Иран. Севкупно, според истрагата, овие два брода транспортирале до 56.000 тони жито во последните осум недели.
Истрагата покажува дека други руски бродови го пренесуваат житото од Севастопол до Керченскиот теснец, меѓу Русија и окупираниот Крим. Тие потоа го предаваат на други, мешајќи го со жито од Русија, што го оневозможува пронаоѓањето на украденото украинско жито.
Според Bellingcat, транспортот на карго во Керченскиот теснец е вообичаен, при што повеќето не се поврзани со операцијата за шверц на жито. Ова го отежнува идентификувањето на украденото жито.
Потпирајќи се на сателитски снимки и медиумски извештаи, истрагата исто така покажа дека Русија ги користи пристаништата во окупираните Мариупол и Бердјанск за своите операции за шверц на жито.
Извозот на жито од Украина, која храни милиони ширум светот, е актуелен проблем од почетокот на целосната инвазија.
Меѓународното хуманитарно право, кое се применува на вооружените конфликти, забранува заплена и реквизиција на прехранбени производи како жито.
Во јули, Русија се повлече од договорот што ѝ дозволуваше на Украина да извезува жито од нејзините пристаништа и го нападна складиштето на жито во Одеса.
Во исто време, Русија започна пропагандна кампања ветувајќи бесплатно жито на африканските народи како дел од нејзината поширока кампања за добивање поддршка низ целиот континент.
Ј. Ѓ. / Фронтлајн
