Претседателот на Република Македонија Ѓорге Иванов донесе одлука да не го потпише Указот за прогласување на Законот за ратификација на Kонечната спогодба за решавање на разликите опишани во резолуциите 817 (1993) и 845 (1993) на Советот за безбедност на Обединетите нации, за престанување на важноста на Привремената спогодба од 1995 година и за воспоставување стратешко партнерство меѓу страните.
Одлуката на претседателот Ѓорге Иванов и непотпишувањето на Указот за законот за ратификација на договорот за името, од Владата ја оценуваат како очекувана, но не влијае на имплементацијата на договорот.
Меѓународниот ден за поддршка на жртвите на тортура од целиот свет денеска се одбележува како потреба од едукација и подигање на јавната свест за сериозноста од последиците, но и преземање акции за спречување тортурата и насилството. Со цел поттикнување на жртвите на тортура да не бидат безгласни туку храбри и одлучни во борбата за своите права, но и во барањето одговорност од институциите во преземање мерки во борбата против насилството и нехуманоста, пред повеќе од 30 години Амнести Интернешнл ја започна кампања #StopTorture. ЦИВИЛ – Центар за слобода ги повикува сите граѓанки и граѓани истовремено да бидат будни, а не неми сведоци на насилството и тортурата.
Франција и Холандија продолжуваат да се противат за старт на преговори во со Македонија. Париз и Амстердам, во страв дека било каков почеток на преговори со нови земји кандидати би имало негативен ефект врз нивната домашна јавност, би сакале стартот на преговори со Скопје и Тирана да се одложи до после европските избори на пролет 2019, велат за МИА дипломатски извори во Советот на ЕУ.
Од останатите настани на денот ја издвојуваме и презентацијата на Извештајот на Народниот правобранител за состобите во затворите, полициските станици и психијатриските болници. Управата за извршување на санкции и Управата на затворот Скопје итно да преземат мерки за почитување на достоинството и интегритетот на притворениците во затворот во Скопје, бидејќи Народниот правобранител при посетите утврдил дека претресите на притворените ги вршат во „дежурната“ просторија, каде што лицата се изложени на погледи и на други службени лица, а поради недостиг на женски кадар, во втора смена, надзорот врз притвореничките се врши од припадници на Секторот за обезбедување, од машки пол, што е спротивно на Мендела правилата.
Пратениците во Собранието денеска на 50. седница ги изгласа претседателот и тројца членови на Регулаторната комисија за енергетика. Опозицијата гласаше против предлозите, спорејќи ја незвисноста на кандидатите.
За претседател е именуван Марко Бислимовски, а за членови Наташа Вељановска, Атанаско Тунески и Гуштрим Рамадани. Регулаторната комисија за енергетика има уште тројца членови, кои беа претходно избрани.
Д. Муратов
