Пишува: БИЉАНА ЈОРДАНОВСКА
Македонското општество го носи белегот на мултиетничко и мултикултурно, за жал, како товар, а не како препознатливост на позитивните вредности, со шаренило од различности кои го отсликуваат единството во заедничката борба за градење демократски политики.
Напротив, она што останува како обележје во тој дискурс на спротивставени идеологии, е „јаболкото на раздорот“, но од внатре кон надвор.
Европската унија ѝ даде можност на Северна Македонија да излезе од тој маѓепсан круг на саморазјадување. Но, поделеноста на македонската политичка сцена ја става во неизвесност државата и нејзиниот потенцијал за напредок, ако се пропушти европската пружена рака.
ЕУ „потенцијалот“ на ВМРО-ДПМНЕ
Со моменталната политичка констелација, институционално, процесите на македонската ЕУ интеграција се одвиваат (речиси) непречено. И покрај тоа што, неофицијално, изборната кампања е веќе одамна почната, и наспроти бугарскиот камен на сопнување, процесот се одвива, се движи напред. Тој процес мора да продолжи со зајакнување во проевропските редови до изборите во 2024 година. Континуитетот мора да се задржи.
Но што по изборите и како исходот од нив ќе влијае на евроинтеграцискиот пат на Македонија? Декларативноста на ВМРО-ДПМНЕ за европска иднина на државата не вреди многу. Особено кога е придружена со ревизионизам, условувања и неподготвеност за дијалог и компромиси.
Но ВМРО-ДПМНЕ, наспроти дволичноста и начинот на водење на внатрешната политика, сепак, има потенцијал да не отстапи од европскиот пат. Не дека нема голема веројатност проевропската ориентација на дел од членството да пропадне под притисок на националистите – но тој потенцијал го има.
Левица, гарантирано антиевропска опција
Антиевропската Левица е гарантирано за стагнирање или уназадување на добрите политики и практики што оваа власт се обидува да ги воспостави. Односно, за уништување на сите придобивки од европскиот пат на државата.
За Левица нема потреба да се објаснува што и како понатаму. Тие се гарантирано антиевропска опција.
Изборите во 2024 година – одлучувачки за европскиот пат
Парламентарните избори во 2024 година на многу начини ќе бидат одлучувачки во клучното прашање за иднината на земјата, а тоа веќе сега е видливо, особено во контекст на демократските процеси каде што европските начела и вредности би требало да бидат приоритет во изборните програми.
Со дијаметрално спротивставени вредности и поставеност на македонската политичка сцена, земјата ќе биде исправена пред избор меѓу антизападните, етноцентристички наративи од една и европските вредности и интеграцијата во ЕУ, од другата страна.
ЕУ блок, ослободен од поединечни и партиски апетити
За да се остане на трасата што води кон ЕУ, потребна е политичка волја и следење на стратегијата за обединување во еден ЕУ блок, ослободен од поединечните или партиските апетити,што ќе тежнее кон консензус во интерес на граѓаните и на државата.
На крајот, одлуката ќе ја донесат граѓаните. Сепак, тоа не значи дека сите чинители не треба да се потрудат да го презентираат јасно и недвосмислено своето европско определување. Создавањето на силен ЕУ блок, претпоставува и ВМРО-ДПМНЕ да се ослободи од суетите и да се одважи да биде дел од европската иднина на Македонија.
