Во пресрет на претседателските и парламентарните избори, политичките партии во земјава продолжуваат со предизборните коалицирања. На помалку од една недела до официјалниот почеток на изборната кампања дефинирани се пет коалициски групирања.
„Коалиција за европска иднина“ предводена од СДСМ, коалиција „Твоја Македонија“ предводена од ВМРО-ДПМНЕ, коалиција „Храбро за Македонија“ предводена од ГРОМ, коалиција „Европскиот фронт“ предводена од ДУИ и коалиција „ВРЕДИ“ на албанската опозиција.
Самостојно на изборите, според досегашните најави, одат ЗНАМ – За наша Македонија и партијата „Левица“.
Партиите што ќе учествуваат во претседателските и парламентарните избори, почнаа со претставување на своите програми со што постепено се добива конечниот облик на фронтот на изборната трка.
Претседателски избори
Претседателскиот кандидат на ДУИ, Бујар Османи на лидерите на Европскиот фронт им го врачи Декалогот со своите 10 заложби како претендент за функцијата шеф на државата. На презентацијата на Програмата присуствуваа лидерите на политичките партии кои се дел од Европскиот фронт,
Османи при презентацијата ги наведе трите основни принципи на програмата од кои произлегуваат 10-те ветувања. Основните столбови се: компасот на геостратешката ориентација на земјата, врзивното ткиво на етничките и политичките наративи, како и Улогата креатор на државниот консензус.
Кампањата на Гордана Силјановска-Давкова од ВМРО-ДПМНЕ за претседателските избори ќе оди под слоганот „Македонија повторно горда“. Според неа, слоганот произлегол од „хроничната и акутна состојба со македонска демократија“ што зборува за слаба држава или држава во пропаѓање.
„Кога велам ‘Македонија повторно горда’, пред сè мислам на граѓаните, повторно горди. Причината е да се врати надежта, причината е да се врати довербата во демократијата, причината е нацијата повторно да знае дека сите во политиката, вклучувајќи ги и шефот на државата или претседателката на државата, имаат обврска во секој свој чекор и потег да се водат од националните односно од државните интереси“, рече Силјановска-Давкова на промоцијата.
Претседателот на Алијанса за Албанците и кандидат за претседател на државата, Арбен Таравари порачал дека пратеничките листи на здружената албанска опозиција нема да содржат лица вклучени на црните листи, мислејќи на листата со санкции на САД. Меѓу другото, тој нагласлил дека на листите ќе има позитивни и професионални личности кои уживаат авторитет.
„Ви гарантирам нешто дека на нашите пратенички листи нема да имаме луѓе кои се вклучени во црните листи. Нема да има личности кои се вмешани во коруптивни афери и нема да има личности кои се политички потрошени. Ќе има позитивни, професионални личности и луѓе кои уживаат одреден кредибилитет во земјата каде што живеат. Тие ќе бидат личности кои уживаат авторитет и се докажани личности во областите“, изјавил Таравари за „Euronews“ на албански јазик.
Актуелниот претседател на Република Северна Македонија, Стево Пендаровски воедно и кандидат на СДСМ за шеф на државата, во интервју за РТЛ изјави дека дека е разочаран од некои од челниците на ЕУ и од некои од претседателите на европските држави.
„Морам да признам и да кажам дека сум разочаран од некои од високите челници не само од ЕУ, туку од поедини држави. Не би сакал сега да ги именувам земјите, тоа не ми личи како претседател на државата, но очекував повеќе од страна на силните земји на ЕУ во тој правец, да ја убедат Бугарија дека може да дозволи да одиме во ЕУ без тие услови. Тоа никој не може да го поверува во Македонија“, смета Пендаровски.
Во недела (31 март), дваесет и пет организации потпишаа Повелба за стратешка соработка, со која се предвидува формирање на Кризен штаб кој ќе води јавна пропаганда за неизлегување и бојкот на претседателските избори. Кампањата ќе се води под слоганот „Македонија – Бојкотира марионета за претседател“.
Парламентарни избори
СДСМ ја промовираше новата изборна програма насловeнa како „Програма за европска иднина“ и кандидатите за пратеници на СДСМ и Коалицијата за европска иднина за претстојните парламентарни избори.
Претседателот на СДСМ, Димитар Ковачевски на промоцијата рече дека тие покажале дека е можно да се постигнат добри резултати, да се работи за подобро утре, да има поголеми плати, пензии, слобода и демократија, слобода на говор, како и дека е можно да живееме во земја која има сигурна, извесна и подобра, европска иднина.
Претседателот на ДУИ, Али Ахмети и Зијадин Села од Алијанса за Албанците, во Гостивар го потпишаа договорот за коалиција. Тие заеднички ќе одат на парламентарните избори во 2024 година.
Досега се спомнати неколку имиња кои ќе се најдат на списокот на пратеници. Меѓу нив се Елми Азири, Илире Даути, Наим Бајрами, а се очекува да има уште неколку имиња. За Европскиот фронт, предводен од ДУИ досега потпиша Народното движење на Скендер Реџепи, потоа ДПА со Мендух Тачи и ЕДП на Аријанит Хоџа.
Договори се потпишани и со Сојузот на Ромите, Турската демократска партија и Движењето на Турците.
Генералниот совет на Демократската унија за интеграција во Тетово ги утврди носителите на листи за пратеници со кои ќе настапи на претстојните парламентарни избори закажани на 8 мај. Во Првата изборна единица носител на листата ќе биде Блерим Беџети, во Втората – Садула Дураку, во Третата – Сулејман Баки од Движењето на Турците на Македонија за правда и демократија, во Четвртата – Енвер Хусеин од Демократската Партија на Турците на Македонија, во Петтата – Зијадин Села и во Шестата изборна единица носител на листата ќе биде претседателот на ДУИ Али Ахмети.
ВМРО-ДПМНЕ на претстојните парламентарнми избори ќе настапи во коалиција со 24 политички субјекти и организации, наречена „Твоја Македонија“.
На 30 март опозициската ВМРО-ДПМНЕ во рамки на партиската конвенција ги промовираше 120-те кандидатите за пратеници на коалицијата „Твоја Македонија“, кои беа утврдени два дена претходно.
Претседателот на ВМРО-ДПМНЕ, Христијан Мицкоски на промоција на кандидатите за пратеници за парламентарните избори 2024 истакна дека државата е во хаос, а ВМРО-ДПМНЕ ветува конкретни проекти, работа и надеж за сите граѓани на Македонија.
Подготви: Н. Абдурахмани во соработка со ЦМТ.