На полноќ започна изборната кампања за претседателските избори закажани за 24 април. Кампањата ќе трае до полноќ на 22 април. На првиот ден од кампањата, дел од кандидатите најавија промовирање и презентирање на изборните програми и отворање на изборни штабови.
Претседателска кампања
Во Скопје денеска беше отворен централниот штаб на претседателскиот кандидат на СДСМ, Стево Пендаровски во рамките на започнување на изборната кампања.
Пендаровски најави дека во текот на кампањата до крајот на првиот круг имаат во план да посетат 65 населени места, во сите изборни едници и сите општини во Македонија.
Изборниот караван на Стево Пендаровски ќе започне со централен митинг во Прилеп, а претходно ќе ги посети општините Кривогаштани и Крушево.
Бујар Османи, претседателскиот кандидат од ДУИ, денеска на прес-конференција го најави почетокот на караванот на „Европскиот фронт“ на претседателските избори.
Османи, смета дека неговите искуства и знаења ќе помогнат да се оствари сонот за евроинтеграции. Тој најави дека неговата кампања ќе се води под слоганот на Европскиот претседател и изборната програма „Декалог на Европскиот Претседател“ со број 4.
Под мотото „Го враќаме достоинството на нацијата“ професорката Билјана Ванковска денеска официјално ја започнува кампањата за претседателка на државата.
На гласачите им порача да не дозволат да бидат заблудени дека 24 април е предјадење, а главното јадење на 8 мај, нагласувајќи дека имаат можност да гласаат за личности, а не за партии.
Со слоганот „Македонија повторно твоја“ кандидатката на ВМРО-ДПМНЕ Гордана Силјановска-Давкова ја почнува кампањата со митинг пред зградата на Владата.
Претседателскиот кандидат на Движењето ЗНАМ, Максим Димитриевски од Крушево ќе ја почне кампањата за претседателските избори. Караванот ќе заврши во Струмица на 22 април. Слоганот на кампањата е „Максимум за Македонија“, а програмата ќе биде именувана како „Манифест за Македонија“.
Коалицијата „Храбро за Македонија“, предводена од ГРОМ, ПЦЕР и ИНТЕГРА го промовираше Стевчо Јакимовски, лидер на ГРОМ, за кандидат за претседател на Северна Македонија на претседателските избори.
Претседателскиот кандидат на коалицијата „ВЛЕН“, Арбен Таравари, вчера ја презентираше претседателската платформа заснована на четири столба, Северна Македонија интегрирана во регионот и Европа, Северна Македонија производител на безбедност, Северна Македонија правна држава и Северна Македонија консензуална демократија.
Демант на Даштевски
Претседателот на ДИК, Александар Даштевски, демантира дека е дел од било каков партиски оперативен план. Од увидот на спомнатиот документ, евидентно е дека се работи за неофицијален и не-автентичен документ особено што во него е наведен датум 05.12.2024 и истиот предизвикува сомнеж, велат од ДИК за ЦИВИЛ, откако во објавата на СДСМ за „лажните анкети објавени на МТВ се нарачани од штабот на ВМРО-ДПМНЕ“, во оперативниот план на ВМРО-ДПМНЕ се спомнува името на претседателот на ДИК, Александар Даштевски.
Петар Арсовски ги демантира МТВ
Аналитичарот и сопственик на агенцијата „Креатиф“, Петар Арсовски, негира дека тој и неговата агенција имаат какво било учество во спроведувањето на анкетите што се објавуваа(т) во емисијата „Објектив“ на МТВ, како што беше наведено во демантот од МТВ.
Подготви: Д. Тахири во соработка со ЦМТ
