Нема да има нови измени на Изборниот законик пред локалните избори на 17 октомври, иако партиите подолго време разговараа за нив. Ова денеска го најави премиерот и лидер на СДСМ Зоран Заев од Кривогаштани, каде што присуствуваше на увид на изградба на регионален пат.
Повикувајќи се на разговор со претседателот на Собранието Талат Џафери, во кој претседателот на Собранието го информирал дека со последните измени со отисок од прст и со измените на ОБСЕ/ОДИХР, премиерот Заев информираше дека законот ќе остане таков каков што е, за да нема замерки дека се прави нешто во „пет до 12, а притоа тоа би било само блокада на законското решение“.
Законското решение ги потврдува поволностите на независните листи, значи прагот останува ист, ги дава сите досегашните можности на конституирање на кандидатските листи за советници и градоначалници, ја зголеми транспарентноста и одговорноста заради вградените препораки од ОБСЕ/ОДИХР, првпат ќе се гласа со отисок од прст во државата што е гаранција за фер и демократски избори и верувам дека таков исчекор ќе продолжиме и натаму да правиме, рече Заев од Кривогаштани.
Оние други измени кои останаа, како што кажа, а се по препорака на ОБСЕ, на опозициските партии и на дел од медиумите ќе останат да бидат вградени во Изборниот законик по изборите.
Партиите ги усогласуваат ставовите, но не можат да ги усогласат сите ставови, пред се, како што кажа Заев, заради реакциите што ги има од страна на Левица, дел од владејачките и дел од опозициските партии
Конечна е одлуката на Парламентот, јас само ја споделувам последната информација од претседателот на Парламентот со кој имав можност да поразговарам во петокот додека славевме 20 години Охридски рамковен договор, нагласи Заев.
СДСМ, следната недела, најдоцна до 25 август, ќе ги соопшти кандидатите за градоначалници и советници за локалните избори.
Во однос на поддршката на кандидати на ДУИ и другите партии на Албанците на изборите, тој кажа дека со ДУИ имаат финален договор дека ќе се поддржуваат во првиот или во вториот круг, во зависност од кандидатите.
Не сакаше да коментира околу кандидатите за градоначалници на ВМРО-ДПМНЕ, бидејќи, како што кажа, тие го дематирале она што било објавено во јавноста, така што ќе чека официјално да бидат соопштени нивните имиња.
