Новиот рудник за ископување на минерални суровини во близина на Битола не ја доби Б-интегрираната еколошка дозвола за работа, до вчерашниот истек на рокот во кој Општина Битола требаше да ја издаде оваа дозвола.
ЦИВИЛ Медиа разговараше со Душко Груевски од здружението на граѓани „За нас се работи“, кое во континуитет го следеше целиот процес за добивање дозволи за изградба на рудник. „За нас се работи“, во изминатиот период одржа повеќе прес-конференции и трибини на кои беше изразена нивната загриженост за негативниот ефект врз животната средина и врз дополнителното загадување на воздухот.
„Уште во 2012 година ‘Стентон градба’ доби концесија за геолошки истражувања. Со таа концесија беше предвидено, во период од две години да се направат истражувања и да се произнесат дали ќе бидат концесионери за ископување на минерални суровини. По две години, ‘Стентон градба’ ги доби сите дозволи за градба од надлежните, освен Б-интегрираната дозвола, која треба да ја издаде Општината. Согласно со законот, одговор дали ќе ја добијат таа дозвола, Општината треба да даде во рок од 60 дена. Ние ја следевме целата процедура и апелиравме до Општината да излезат на терен, да се направат потребните анализи и да се изјаснат. Вршевме притисок преку прес-конференции, поднесовме барање за пристап до јавни информации до Општината. Одговорот што го добивме беше само одолжување“, објаснува Груевски како се одвивала целата процедура.
На Комисијата за животна средина, а потоа и на седница на Советот на Општина Битола е одлучено да не се издаде дозвола. Како што велат од Општината, дозволата не е издадена, заради потреба од дополнителни консултации и мислења од Министерството за животна средина.
„Нашиот став е дека целата процедура од Општината е несериозна, во поглед на поднесување на барањето и одговорот што само се одолжува, а за кое време – концесионерот работи. Процесот за давање дозвола е поедноставен и требаше да се одлучи досега, а не да се врати назад кај Министерството за животна средина. Во ред е Општината да врати на разгледување, но концесионерот во тој период да прекине со работа, што сега не е случај. За цел овој период во кој се чека одговор, концесионерот продолжува со работа. Враќањето на повторно одлучување е беспредметно, затоа што надлежните институции веќе ги издадоа потребните дозволи што се во нивна надлежност“, смета Груевски.
Од „За нас се работи“ уште еднаш потсетуваат кои се главните проблеми за изградба на каменоломот кај месноста „Билбил Камен“.
„Ние сме против затоа што е многу блиску, односно, само на 800 метри до градот и затоа што нема ниедно мерење што покажува дека нема да ја загадува животната средина. Б-интегрираната дозвола, всушност, е анализа на загадувањето при процес, таа дозвола го анализира работењето, додека сите други дозволи се издаваат претходно. Ние сме против некоректниот однос на Општина Битола, против несериозниот однос кон проблематиката“, изјави Груевски за ЦИВИЛ Медиа.
„Најголем проблем е Општината, не концесионерот. На наша трибина што ја организиравме во јули минатата година, концесионерот рече дека доколку се покаже дека работата на каменоломот загадува, подготвен е да го прекине работењето, да ги понесе сите трошоци. Концесионерот работи согласно дозволите. Општината со ова одолжување е таа што му дозволува да загадува“, категоричен е Груевски.
