Американскиот државен секретар Ентони Блинкен во Пекинг се сретна со кинескиот министер за надворешни работи Ванг Ји за да разговараат за низа сложени прашања, вклучително и продлабочување на тензиите околу поддршката на Кина за руската инвазија врз Украина.
Состанокот траел неколку часа зад затворени врати.
На почетокот на средбата Ванг му рекол на Блинкен дека „големиот брод“ на кинеско-американските односи се стабилизирал, „но негативните фактори во односот продолжуваат да се зголемуваат“.
– А односот се соочува со секакви видови нарушувања кои можат да доведат до ривалство, конфронтација, па дури и конфликт. Кинеските легитимни развојни права се неразумно потиснати и нашите клучни интереси се соочуваат со предизвици, нагласил тој.
– Дали нашите две страни треба да ја предводат меѓународната соработка за глобалните прашања и да постигнат добробит за сите или да се впуштат во ривалство и конфронтација или дури и да западнат во конфликт, што би било загуба за сите? Меѓународната заедница го чека нашиот одговор, нагласил Ванг.
Блинкен одговори дека е потребна „активна дипломатија“ за да се продолжи напред со агендата што ја поставија претседателот Џо Бајден и претседателот Си Џинпинг кога се состанаа во Сан Франциско во ноември.
– Во нашата проценка, не постои замена за дипломатијата лице в лице, рече Блинкен, додавајќи дека сака да се увери дека „тие се што е можно појасни во областите каде што има разлики, барем за да се избегнат недоразбирања, за да се избегнат погрешни проценки“.
Блинкен денеска најверојатно ќе се сретне со кинескиот претседател Си Џинпинг пред да се врати во Вашингтон во вечерните часови, иако ниту една од страните сè уште не ја потврдила средбата. Тој се состана и со кинескиот министер за јавна безбедност Ванг Ксијаохонг. Блинкен вчера пристигна во Пекинг од Шангај, каде што ја повика Кина да обезбеди еднакви услови за американските компании.
