Мирослав Јовановиќ, управител на „Слободен печат“ во интервју, говори за негативното влијание на корона-кризата врз прометот на „Слободен печат“ и воопшто на дневните весници во земјава.
„Печатените медиуми, како насекаде во светот така и во Македонија, се погодени од корона-кризата. Од една страна, тоа е резултат на намалениот промет, а од друга страна од намалените реклами. Порталите, пак, особено во ова „ново време“, кога секој пребарува информација повеќе, како за пандемијата, така и за други содржини за кои сега има повеќе време во однос на нормалните услови на живеење, доживуваат поголема експанзија, но од економска гледна точка, тоа не е придружено со поголеми приходи“ – вели Јовановиќ.
За разлика од опаднатиот промет, открива Јовановиќ, интернет платформата на весникот доживува вистински бум.
– Во време кога сме ограничени со секакви препораки за заштита од пандемијата, луѓето повеќе се ориентирани кон веб-страницата и можам да се пофалам дека тука имаме бум со порталот Слободен печат, во смисла на број на посети и прегледи – вели Јовановиќ.
Но, интересот за содржините на порталите не е следен со интересот на огласувачите, затоа што во време на пандемија тие се соочени со свои тешкотии и со кратење на трошоците. Како најтешки месеци во однос на закупот на рекламниот простор, било да е тоа во печатениот медиум или на порталот, се покажале април и мај минатата година.
За владините мерки за поддршка на весниците, Јовановиќ вели дека се задоволни, наспроти критиките дека тоа може негативно да влијае на нивната објективност. Аргумент за тоа е дека уредувачката политика воопшто не е променета, што може да се заклучи од следење на содржините во весниците кои добиле државна помош, што беше дел од владините мерки за справување со економските последици од корона-кризата.
Тој ја коментира и даночната политика, како и потребата од понатамошен развој на електронската продажба.
– Различните даночни стапки звучат малку парадоксално, можеби тоа треба да се „исполира“, да се доведе во иста линија, земајќи предвид дека продаваме идентичен производ. Останува да разговараме за ова со претставниците на Владата, да објасниме за што станува збор. Засега ова е незначителен износ, но иднината на медиумите ја гледаме во електронската продажба и затоа треба да се отпочне тој разговор, но еве тоа нека остане за некои подобри времиња – вели Јовановиќ.
извор: СЛОБОДЕН ПЕЧАТ
