„Овие избори ќе бидат сложени, од причини што, ние во Македонија имаме сериозна криза. Политичката криза ја надоврзувам со правната и моралната криза. Правната криза укажува на сериозни правни проблеми, за кои нема разрешница, а се однесуваат на најтешките кривични дела што се случуваат во нашата држава. Тоа е корупцијата или употребуваниот израз ‘морална расипаност’. Во таа корупција се вклучени функционерите на власта“, рече професорот д-р Осман Кадриу, на денешната конференција „Слободни избори за слободно општество“, што во организација на ЦИВИЛ – Центар за слобода се одржа во Клубот на новинарите во Скопје.
„Правната криза настанува, зашто за тие функционери во власта, извршители на корупција, нема оставки и нема разрешница за направените кривични дела. Ова упатува на заклучок, дека кај нас правото и моралот се во криза. Местото на правото го зазеде неправото, кое што се однесува како да е право, а фактички е антиправо, противправо. При една ваква состојба, оваа појава нам ќе ни се одрази во изборите“, посочи Кадриу.
„Барам законот да се почитува, мораме бурно и будно, со значајна надлежност на граѓанскиот сектор и медиумите, да го следиме однесувањето на ДИК и сите органи, кои што ги спроведуваат изборите. Како да им овозможиме на граѓаните, нивниот глас и нивната волја, да не се злоупотребат, како да имаме законски избори? Законитоста е битна компонента за да можеме да зборуваме за правото, правниот систем во земјата. Тоа бара сите дејства и одлуки да бидат запазени. Да се обезбеди од државата и нејзините органи, законитост во постапката и да се обезбеди законска одговорност, ако се потврдува правото во изборната постапка“, истакна професорот Кадриу.
„Досега во сите избори, се утврдени сериозни аномалии, на конректни кривични дела, а институциите и органите беа парализирани, немаше одговорност. Но, колку луѓе има осудено за кршење на изборните права? И таму каде што има, судот ќе се заложи за да изрече една условна пресуда. Затоа ќе речам дека правото и неправото се во конфликт, зашто неправото е во ситуацијата во која се обидува да биде право. Да се почитува правото на земјата, значи да се почитува основниот темел на таа земја. Нема поголема среќа за една држава, ако во неа царува правото, наместо неправото, тоа е среќа за нејзините граѓани“, заклучи Кадриу.
Моника Талеска
Фото: Биљана Јордановска
Камера: Атанас Петровски и Дехран Муратов
Монтажа: Ермин Климента