Град Скопје и општините Битола, Велес и Куманово, решија да ги откажат новогодинешните прослави на плоштадите и средствата да ги пренаменат во хуманитарни цели. ЦИВИЛ Медиа се обиде да добие одговор каде завршија средствата кои до минатата година се трошеа за организирање на новогодишни прослави и за хонорари на македонските и странските естрадни уметници.
Од Општина Велес, велат дека средствата веќе се искористени за помош на социјалните семејства од градот. „Од Центарот за социјални работи, ни испратија листа на 40 најзагрозени семејства во Велес, на кои им дадовме ваучер од по 2.000 денари, а направивме и пакети со прехранбени производи и средства за хигиена во вредност од 2.500-3.000 денари. На овој начин, парите предвидени за новогодинешните прослави во Велес, ги искористивме во хуманитарни цели“, велат од Општината.
Градоначалникот на Општина Битола, Владимир Талески, на прес-конференција на 22-ри декември, изјави: „Сумата од 1.000.000 денари, предвидена за тоа, ќе се пренамени за хуманитарни цели. Дел ќе се искористи за опремување на сензорна соба во Заводот за рехабилитација на деца со оштетен, слух, говор и други потреби ‘Кочо Рацин’ во Битола, а дел за социјални категории“.
Сепак, и покрај конкретниот став на Талески од пред Нова година, за тоа каде ќе се користат средствата, секретарот на Општина Битола, Слободан Бончаноски за ЦИВИЛ Медиа изјави: „Советот има донесено одлука дека до крајот на јануари ќе се формира специјално тело кое ќе одлучува колку средства за што ќе бидат наменети“.
Општина Куманово денес имаше проблеми сотелефонските линии и оттааму бевме известени дека прашањата ќе бидат пренесени на надлежните, по што ќе ни ја проследат бараната информација.
Лицето одговорно за односи со јавност и информации за граѓани на Град Скопје и по големиот број на обиди не успеавме да го добиеме.
Како што известува Радио МОФ, тие успеале да добијат одговор од Град Скопје кој гласел: „Каде ќе се донираат (средствата), и на кој начин, ќе одлучи Советот на Град Скопје, а седница се нема одржано изминативе неколку недели. Оваа одлука ќе се најде на дневниот ред на некоја од наредните седници. Град Скопје благовремено ќе ја информира јавноста кому ќе му бидат доделени овие средства“.
И, од партијата Левица, денеска апелираа до локалните самоуправи да ја информираат македонската јавност за какви цели ќе ги искористат парите предвидени, а непоторшени за новогодинешните прослави.
„Левица бара локалните самоуправи кои ги откажаа новогодишните прослави, да објават јавно и транспарентно, каде точно завршија средствата, за кои ветија дека ќе ги пренаменат за хуманитарни цели…Доколку локалните самоуправи одбијат транспарентно да објават каде точно завршија парите на граѓаните, со право може да се смета дека тоа беше само уште еден нивни магионичарски трик, фрлајќи им магла во очите на граѓаните“, се вели во соопштението на Левица.
М. Теговска
