„Национализмот е најголем непријател на мирот“, како што кажал Џорџ Орвел и затоа сметам дека има огромна разлика помеѓу национализмот и патриотизмот, вели за ЦИВИЛ Медиа, активистот Акиф Кариман.
„Национализмот негува културно наследство кон јазикот на својата нација и доведува до чувство на ривалство со останатите, и непочитување и неподнесување на подредените. Додека, патриотизмот повеќе се базира на емпатија и вреднување на вредносен систем кон својата нација. Ако сум патриот го сакам својот народ, но, истовремено ги почитувам и останатите, ги почитувам различностите, додека кај национализмот – ги сакам толку многу моите што другите не можам да ги смислам“, истакна Кариман.
Тој додава дека Ромите она што го претприја како нација од страна на национализмот е геноцидот од Втората светска војна каде што неофицијално се убиени околу половина милион Роми и Синти.
„Загрижувачки е тоа што гледаме дека во последно време национализмот почнува повторно да се шири низ цела Европа. Има доста примери, како убиствата на Роми во Украина и Словачка од нео-нацистите, во Италија има националистичка влада која сака да направи посебен регистар, односно етнички попис на Ромите… Во име на патриотизмот се солидаризирам со Ромите врз кои има некаква неправда било каде во светот и им давам поддршка, што не значи дека јас ги мразам останатите. Пример ние протестиравме против политиките на итајланската влада, а не против Итајланците“…
Тој смета дека структурите кои се на власт, сите политички партии, особено сите влади треба јавно да излезат и да бидат против национализмот и фашизмот.
„Кога државните структури водат националистичка политика, граѓаните коишто ги гласале им веруваат и се „палат“ на тоа. Но, доколку политичарите повикувааат на мир, толеранција, почит, тогаш и граѓаните ќе се однесуваат така. Ние како активисти колку и да се бориме не можеме да го смениме целиот систем, бидејќи системот сепак го раководат политички структури“, потенцира Кариман.
Дехран Муратов
Камера и монтажа: Ариан Мехмети
Текстот е дел од проектот „Патриотизам ДА, национализам НЕ!“ што го спроведува ЦИВИЛ со поддршка од Цивика мобилитас. Содржината на овој текст е единствена одговорност на ЦИВИЛ и на ниту еден начин не може да се смета дека ги одразува гледиштата на Цивика мобилитас, Швајцарската агенција за развој и соработка (SDC) или организациите што ја спроведуваат.
