Кинеските рафинерии направија нови нарачки за руска сурова нафта што ќе бидат испратени од пристаништата што обично ја снабдуваат Индија, бидејќи побарувачката од јужноазиската земја за суровата нафта од Москва се намалува по царините на американскиот претседател Трамп.
Како што пренесува Си-ен-ен, најмалку 15 товари руска нафта се обезбедени од кинеските рафинерии за испорака во октомври и ноември, велат аналитичарите.
Кина и Индија се појавија како главни купувачи на руска нафта по инвазијата на Москва врз Украина во 2022 година, што ги натера западните земји да го избегнат нејзиниот извоз.
Трамп во јули се закани дека ќе воведе секундарни царини за стоки од земји што увезуваат руска нафта за да изврши притисок врз Москва да ја прекине војната во Украина.
Порано овој месец, тој објави дополнителна царина од 25% за индискиот извоз во САД, покрај уште една царина од 25%, за нејзиниот увоз на руска нафта и гас. Тоа доведе до тоа земјата нагло да ги намали своите купувања.
Од минатата недела, кинеските државни и големи приватни рафинерии купија околу 13 товари западноруска сурова нафта за испорака во октомври и најмалку два товара за ноември, изјави Мују Сју, виш аналитичар за сурова нафта во „Кплер“, кој ги следи податоците за стоки и испорака.
15-те товари нафта, секој од нив обично со капацитет од 700.000 до 1 милион барели, ќе бидат натоварени од руските арктички и црноморски пристаништа – залихи што обично одат во Индија наместо во Кина, со оглед на нејзината оддалеченост, рече Сју.
Ројтерс претходно оваа недела објави дека Кина обезбедила 15 руски товари за истиот период, цитирајќи аналитичари.
Сју рече дека купувањето одразува „опортунистички“ потег, при што цената на руската нафта останува најмалку 3 долари по барел поевтина од алтернативите од Блискиот Исток.
„Што се однесува до тоа дали Кина ќе продолжи да купува, јас лично верувам дека во моментов тоа е сè уште многу добра можност, бидејќи во Индија Трамп сè уште врши силен притисок врз нив“, рече таа.
Во петокот, по неговиот значаен состанок со рускиот претседател Владимир Путин, Трамп изјави за „Фокс њуз“ дека не размислува веднаш за одмазднички тарифи врз Кина поради нејзиното купување руска нафта, но посочи дека може да го стори тоа „за две или три недели“.
„Искористувајќи ја оваа можност додека цените се ниски, мислам дека повеќе рафинерии веројатно ќе размислат да купат повеќе, во рок од една или две недели“, рече Сју, осврнувајќи се на кинеските рафинерии.
Минатата година, Индија увезе нафта и сурова нафта во вредност од 53 милијарди долари од Русија, според податоците собрани од Обединетите нации. Пред неодамнешните намалувања, руските залихи сочинуваа 36% од индискиот пазар, што ја прави земјата нејзин најголем извор на сурова нафта, според „Вортекса“, фирма за енергетски податоци.
Кина, исто така, го зголеми увозот на руска нафта со попуст по инвазијата на Москва во Украина. Русија обезбедува 13,5% од увозот на сурова нафта во Кина, според „Вортекса“. Минатата година, Кина увезе руска нафта и сурова нафта во вредност од 62,6 милијарди долари, покажуваат податоците на ОН.
Сју рече дека Кина веројатно нема да го надомести недостигот од купувања на руска нафта од страна на Индија, бидејќи Индија купува околу 1,7 милиони барели дневно од Русија, додека Кина купува само околу 1,2 милиони барели руска нафта што се транспортира по море дневно.
„Ако Индија продолжи да се воздржува од купување, тоа ќе биде вистински проблем за Русија – Кина едноставно не може сама да го преземе целиот обем на Индија“, рече таа.
Д. Мишев
