ВЕСТ НА ДЕНОТ: Џафери ја закажа Конститутивната седница на Собранието на 4 август
Претседателот на Собранието на Република Северна Македонија, Tалат Џафери го потпиша Решението за свикување на Првата – Конститутивна седница на Собранието на Република Северна Македонија.
Конститутивната седница ќе се одржи на 4.8.2020 година (вторник), со почеток во 12 часот. Со оглед на новонастанатата состојба со пандемијата Ковид-19 и во согласност со препораките од Комисијата за заразни болести, Конститутивната седница ќе се одвива според протоколи и критериуми што се утврдени во претходна координација со претседателот на Комисијата за заразни болести д-р Жарко Караџовски, со цел да се намали ризикот од ширење на коронавирусот.
ИЗЈАВА НА ДЕНОТ: Јовановиќ: Најстрога казна за сите газди на фирми кои профитираат врз грбот на работниците
ФЛЕШ ВЕСТИ:
Претседателот на ССМ, Дарко Димовски, на „Утрински брифинг“ на „Слободна ТВ“ изјави дека ССМ бара кривична одговорност за работодавачите кои не ги исплатиле 14.500 денари дадени од државата.
ВМРО-ДПМНЕ го започнува процесот на кадровското освежување, информираа од нивниот центар за комуникации.
Градоналачникот на Скопје, Петре Шилегов, на денешниот брифинг со новинари истакна дека смета дека треба да има референдум за Универзална сала.
Министерството за внатрешни работи постапува по дивоградбата кај ТЦ Мавровка, известено е и Јавното обвинителство.
Агенцијата за заштита на личните податоци информира дека започнала постапка за спроведување на супервизија над законитоста на преземените активности при обработката на личните податоци и нивната заштита од страна на ДИК.
Лекарите советуваат децата од септември да се вратат во училишните клупи.
ЦИВИЛНИ АКТИВНОСТИ:
ЦИВИЛ повикува на локален референдум за Универзална сала
Поттикнати од колумната на Сашо Орданоски „А зошто да не: градски референдум за „Универзална сала“?, ЦИВИЛ донесе одлука да поднесе иницијатива за локален референдум за Универзална сала, дали ќе се гради на нова локација, дали ќе се реставрира сегашниот објект или ќе се урива, а на негово место ќе се гради парк… За тие и други прашања поврзани со оваа тема, најдобро е да се организира референдум.
СЛОБОДНА ЗОНА
„И јас, како и илјадници други скопјани, а и граѓани од другите градови на Македонија, ја чувствувам „Универзална“ како дел од моето лично културно искуство, како формативно место за еден важен дел од мојот светоглед, не само во областа на изведувачките уметности и културата. Бидејќи живеам на некои 200-300 метри од салата, и денеска, кога тоа тажно и градежно потрошено здание стои како скелет на некој урбан и одамна мртов диносаурус, секојдневно се меткам низ околните кафулиња („Броз“, „Че“, „Белиер“…) и безобразно се гојам во „Силбо“ и „Апче“ (ах!!!), лесно закажувајќи средби и состаноци „кај Универзална“, пишува Сашо Орданоски во колумната „А зошто да не: градски референдум за „Универзална сала“?
Ангела Петровска