Спорната одлука на претседателот Доналд Трамп за забрана на влез во САД на граѓани од претежно муслимански земји повторно е стопирана, овој пат на неопределено време.
Дерик Вотсон, федерален судија од Хонолулу ја продолжи досегашната, привремената забрана на спроведувањето на втората одлука на претседателот, донесена на 15 март, па истата, сега ќе важи неопределено време.
Во првичната одлука, Вотсон аргументираше дека забраната за влез во земјата е верски дискриминирачка и со тоа неуставна, а позицијата на американската влада е „нелогична“. Според судијата, доколку забраната стапи во сила, се стравува дека би предизвикала „непоправлива повреда“ на правата и јавните интереси.
Повод за привремената суспензија на одлуката на Трамп, којапредизвика бројни реакции во САД и низ светот, беше жалбата на сојузната американска држава Хаваи против претседателскиот декрет, кон која се приклучија и 13 други сојузни држави.