Извршната директорка на Младински образовен форум (МОФ), Дона Костуранова, во разговор за ЦИВИЛ Медиа, изјави дека 2017 година била една комплицирана и тешка година, но дека сепак се направиле многу значајни истапувања напред кои биле важни за демократијата во Македонија. Како дел од најзначајните истапувања ги издвои започнатата кривична постапка за прекумерната полициска сила која беше извршена врз студентите на студентските избори претходната година, укинувањето на екстерното тестирање и започнатиот процес на креирање на нов закон за високото образование.
„Во 2018 година се надевам дека ќе имаме повеќе младинско учество во општините и во локалните самоуправи, каде локалните младински совети треба да добијат право да си ги бираат сами своите младински претставници, нешто што сега во повеќето општини го немаат, и да си ги претставуваат своите интереси пред локалните самоуправи“, изјави Костуранова.
Таа посочи дека за реформите во образованието треба да се бориме тие реформи да бидат за поквалитетно образование, образование кое вреди, од кое што добиваш нешто и стануваш и подобар граѓанин и поконкурентен на пазарот, а не само како досега образование кое многумина го завршуваат, но ништо не добиваме од него.
„Следната година веројатно ќе имаме и нови студентски избори, кои треба конечно да го поништат оној криминал од претходните избори, со крадени гласачки кутии, со нерегуларно распишани избори, со насилство врз студенти, да имаме студентски парламенти за пример кои ќе бидат сочинети од пратеници, а не само од еден некој единствен лидер, кој ќе ги контролира и злоупотребува“.
