Договорот меѓу премиерот Заев и претседателот на Алтернатива Гаши за влез на оваа партија во Владата предизвика и голем број на објави на социјалните мрежи полни со дезинформации, но и поттикнување на нетрпеливост.
Во твитот на извесен „г-дин Македон“, кој минатата недела беше еден од најпопуларните твитови со дури 165 споделувања и над 630 реакции, се поттикнува етничка нетрпеливост и се изнесуваат следниве дезинформации: „90 пратеника Македонци 4 министри, 30 пратеника Албанци 12 министри.“.
Твитер налогот Гоце Чекоров Ланс, на 5 декември , пак, објави дека „Владата на СДСМ има 2 министри од СДСМ. 2 Два Министри“. Оваа објава достигна над 100 споделувања и 375 реакции.
Но, не е точно дека има „90 пратеника Македонци 4 министри“, како што не е точно ни дека има „Албанци 12 министри“, ниту пак дека владата има 2 министри од СДСМ. Слични дезинформации, со слични намери беа пласирани и во популарни постови на Фејсбук.
Страницата Приказни од Булеварот, на 6 декември исто така објави пост во кој се вели:’
„Во Влада имало 18 министри од албанско етничко потекло и 17 од македонско(чисто сумљам дека и тие 17 сите се Македонци) Па сеа драги мои Македонци, удрете есап колку чини вашиот глас на избори. Како 200 000 гласа на Албанците носат повеќе власт во Македонија од 650 000 на Македонците“.
Објавата доби над 1800 реакции и дури 73 споделувањa.
Овие објави полни со дезинформации не би ни заслужувале внимание и анализа во „Кратки нозе“, доколку не се најдеа меѓу најпопуларните твитови и Фејсбук објави на неделата, и доколку не беше очигледна намерата да поттикнат етничка нетрпеливост. Публиката треба да ги отфрли објавите на овие подбуцнувачи, и да не дозволи да биде жртва на нивните манипулации.
Автор и водител: Петрит Сарачини
Камера: Атанас Петровски
Монтажа: Ариан Мехмети
Стручен соработник на сценарио: Жарко Трајаноски