Министерството за внатрешни работи поднесе кривична пријава против М. К. (37) од Скопје, поради основано сомнение за сторено кривично дело „Насилство“, зашто заедно со уште едно, засега непознато лице на органите на прогонот, на 27 февруари, им нанесе телесни повреди на двајца новинари од инфопорталот А1 Он. Инцидентот се случил, според МВР, околу 18.45 часот на улица „Македонија“, пред Портата Македонија, по завршувањето на протестниот марш на група граѓани, под името „За заедничка Македонија“.
„Во моментот кога оштетените забележале повеќе лица како од Порта Македонија фрлаат ливчиња/флаери, во форма на банкноти со текст на македонски и албански јазик, па одлучиле да го документираат настанот, им пришол М.К. со уште едно непознато машко лице и од нив побарале да се легитимираат. Оштетените одбиле, кажувајќи им дека немаат потреба да им се легитимираат ним, бидејќи тие не се службени лица. Незадоволен од реакцијата на новинарите, пријавениот прво физички го нападнал Александар Тодевски удирајќи го со боксови и клоци во пределот на главата и телото, а Владимир Желчески, бидејќи бил наведнат да ги снима ливчињата-банкноти добил удар во задниот дел од главата, по што паднал на земја, добил уште еден удар во предел на вратот со нога, а потоа паднал во бесознание“, соопшти МВР.
Насилниците веднаш избегале од местото на настанот. Повредените биле пренесени итно во Клиничкиот центар „Мајка Тереза“, каде им се констатирани телесни повреди и по укажаната лекарска помош, се пуштени на домашно лекување.
Десет дена по нападот на новинарите, министерот за внатрешни работи, Агим Нухиу денеска и лично на претседателот на Здружението на новинарите (ЗНМ), Насер Селмани му ја пренесе веста за делумното расветлување на случајот.
„Сакам да пренесам порака дека никој не е над законот и дека секој што се огрешил, еден ден ќе сноси одговорност. Ние мора да ги почитуваме уставните вредности и тука сум да ја продолжиме ефективната соработка со Здружението на новинарите“, акцентираше министерот Нухиу.
Селмани пак, смета дека во Македонија се воспоставува нова практика, МВР брзо да ги идентификува напаѓачите на новинарите. Тој изрази надеж дека Обвинителството брзо ќе го процесуира
случајот и дека судот ќе го казни напаѓачот на новинарите.
„Ова е многу битно, затоа што ако институциите се на ниво на нивната задача, ќе
пратат порака до јавноста дека насилството против новинари е недозволиво и дека секој што ќе се дрзне да ги нападне, ќе биде санкциониран“, рече Селмани.
На средбата Нухиу – Селмани било разговарано и за интензивирање на активностите за расветлување на другите случаи на напади врз новинари и за водење посебен регистер за напад врз новинари, по теркот на најдобрите европски практики.
Вчера меѓународната организација „Репортери без граници“ ги осуди нападите врз македонски новинари за време на протестите во Скопје и побара власта да го расветли насилството и да гарантира безбедност на медиумските работници.
„Во овој тензичен контекст, ги повикуваме сите политичари да делуваат со воздржаност и да избегнат ексалација на насилството. Исто така, бараме властите да ја гарантираат безбедноста на новинарите, за тие да можат да си ја вршат работата како што треба“, порачаа „Репортери без граници“.
Моника Талеска