Здружението на јавните обвинители побара од Собранието да ја повлече од дневен ред точката за изменување на Законот за платите на јавните обвинители. Велат дека се свесни за економската состојба во државата и потребата од мерки за штедење, но потсетуваат дека согласно Законот за платите на јавните обвинители, платата не може да биде намалена со закон или со одлука на државен орган, освен во случај на утврдена дисциплинска одговорност.
„Функцијата јавен обвинител е неспојлива со извршувањето на каква било друга функција или дејност. Поради тоа, платата е единствен приход за јавните обвинители и таа се движи во распон од минимални помалку од 90.000 до максимални 130.000 денари. Со вакви износи платите на македонските јавни обвинители се апсолутно најниски во регионот, а со останатите европски земји не можат ниту да се компарираат“, велат од Здружението на јавните обвинители.
Група пратеници во Собрание на Република Северна Македонија поднесоа измени на шест закони за платите на избраните и именуваните функционери. Пратеникот Бојан Стојановски од ВМРО-ДПМНЕ очекува тие брзо да бидат усвоени по скратена постапка.
Целта е, како што рече, поправична распределба на буџетските средства и усогласување на платите со економската состојба. Со намалување на коефициентите ќе се намалат платите на функционери, пратеници, министри, судии и обвинители за околу 10-13 илјади денари, а кај некои и повеќе. За градоначалниците се предлага нова скала според бројот на жители.
Според Стојановски, измените се уставни, а заштедените средства од февруарската плата ќе останат во буџетот и ќе се пренаменат за здравство, образование и социјална помош. Тој повика на широка поддршка, нагласувајќи дека станува збор за морална одговорност кон граѓаните.
