Објавата на Фејсбук страницата со навреда во сопствениот назив „Сајбер клуб лудата јоци“ (Cyber Club Ludata Joci) е само една од стотиците објави во изборниот период. Ова е уште еден неславен пример на говор на омразата, манипулациите со фактите и директни закани против граѓанското општество.
Фејсбук страницата Cyber Club Ludata Joci отворено и се заканува на организацијата ЦИВИЛ и ги повикува граѓаните да ги снимаат и фотографираат членовите на Мониторинг тимот на ЦИВИЛ и да им ги достават материјалите.
„Значи Македонци секаде каде ќе сретнете од мониторинг тимот на Цивил сликајте ги, снимајте ги и доставете ни ги прилозите ние јавно ќе ги објавиме. Секако анонимноста ќе биде строго застапена. Ви благодариме однапред! Македонци, гласајте за било кој само не за монструмите од СДС и ДУИ кои се најодговорни за ова обезличување, безредие и доминантно фашистичко владеење кое владее во северџанистан. Гласајте да им го расклинкаме и онака трулиот систем од внатре и да си ги вратиме суверенитетот, честа и достоинството назад!“, стои меѓудругото во објавата.
Притоа, објавата претставува кршење на изборниот молк, што е казниво според законот, имајќи предвид дека оваа, како и низа други профили на социјалните мрежи, се дел од партиски структури кои со години спроведуваат црна кампања. Овој пост го споделиле неколку Фејсбук страници меѓу кои: „Поддршка зa Премиерoт Никoлa Груевски – никoгaш не прифaќaме негoвa oстaвкa“, „Види Види“, „Налет да се сторите“, „Јован Кукузел“...
ЦИВИЛ како и досега изборите ги мониторира и набљудува непристрасно и сè што е поврзано со ЦИВИЛ е транспарентно и достапно за јавноста.
Мониторинг тим на ЦИВИЛ