Крушево е град речиси без млади луѓе! Мал е бројот на среднисти и дипломци коишто не го напуштиле градот и успеале да најдат работа, во државна администрација или во неколкуте фирми, што го претставуваат крушевското стопанство. Младите заминуваат од гратчето, неретко со билет во еден правец…
„Доаѓаме само за време на продолжени викенди. Студирам во Скопје, а брат ми се обидува да најде работа во главниот град. Овде е депресивно, нема никаква забава за млади. Пусто е, празно. Добро е што студирам, во спротивно, животот за млад човек овде е многу депримирачки“, вели млада крушевчанка, којашто инсистира на своја анонимност.
Но, нејзината младешка тага ја делат и другите врсници кои ги затекневме во неколкуте локали, при саботната посета на ова мало гратче, кое животот и економијата, главно ги темели врз туризмот.
„Младински сојуз – Крушево“ е невладина организација што со години ги следи проблемите на младите.
„Невработеноста е најголем проблем. И ќе остане сѐ додека не почне ерата на економски развој, инвестиции и нови работни места. Но, многу значајно е да им се даде можност на младите да учествуваат во процесот на донесување одлуки на локално ниво, каде ќе дојде до израз нивната креативност, идејност…. Потребни се и проекти за самовработување“, вели Методија Стојчески, претседател на невладината организација.
Во Одделот за Локален економски развој (ЛЕР) во Крушево, истакнуваат дека за период од четири години, се реализирани три поголеми инвестиции, со кои се отворени преку 400 работни места.
„Во грчката компанија за обработка на тутун ‘Секе’, покрај редовните, еве втора година, сезонски се ангажираат и преку 250 работници. Во американската ‘Маркнорт-Америка’ за производство на медицински масла од cannbis sativa, за еден месец ќе бидат остварени 100 вработувања, а веќе четврта година во конфекцијата ‘Фалко’, работат 70 текстилци“, вели Коста Мицкоски, раководител на Одделението за ЛЕР.
Градоначалникот на Крушево, Ѓорѓи Дамчески, истакнува дека заложбите на Општина Крушево се токму во правец на решавање на, како што вели, најгорливото прашање за градот, невработеноста.
„Вложивме максимални напори и ја отворивме индустриската зона ‘Опаленик’, каде што половина од вкупно 12 хектари земјиште, е откупено од компанијата ‘Секе’. Реализираните инвестиции досега се и како резултат на нашата подготвеност да излеземе пресрет на барањата на инвеститорите, а и нашите планови се во тој правец, да ги создаваме како Општина, сите предуслови за стимулирање на потенцијалните инвеститори своите бизнис планови да ги реализираат овде, во Крушево“, акцентира Дамчески.
Според Агенцијата за вработување во Крушево се евидентирани 980, но според познавачите на приликите реално се невработени 1.400 лица. Од нив третина се млади луѓе.
Од некогашните 5.330 граѓани, регистрирани со пописот, како последица на ‘белата чума’ и иселувањето, денес бројот на жители е за 2.000 помалку!
