„После толку години успеавме да постигнеме договор со Грција, но, за жал, не успеавме меѓу себе да се договориме. Рефлектирам на тоа дека ВМРО-ДПМНЕ и СДСМ не успеале да се договорат ниту за референдумското прашање, а не за нешто повеќе. Жално е што ги пропуштивме сите овие години како граѓанско општество да помуабетиме за патриотизмот, особено кога беше актуелна претходната влада кога имаше поделби на патриоти и предавници“, истакна Александар Кржаловски од МЦМС, на панел дискусијата „Патриотизам – да! Национализам – не!“ која ja организираше ЦИВИЛ – Центар за слобода.
„Со договорот со Грција повторно доаѓаме во ситуација кој е предавник а кој е патриот. Мислам дека доколку партиите меѓусебно се договараа ќе имавме подобар договор, сега сум сигурен дека од овој договор подобар нема да има, бидејќи се објавени позициите. Од друга страна е добро што имаме договор и сега сме ставени пред тежок избор да вагаме дали придобивките од договорот за членство во НАТО и ЕУ се добри за жртвата што ја правиме“, потенцира Кржаловски.
„Ние правевме две анкети за референдумот, и едната е дека има стабилна подршка „за“ референдумот, околу 41 посто, но не е доволно за цензусот на референдумот, иако околу 58 посто рекоа дека ќе излезат на гласање… Во Брегзит од 65 милиони се регистрирале дека 45 милиони ќе излезат на гласање, меѓутоа излегоа само 33 милиони, околу 12 милиони не излегоа на гласање. На крај резултатот беше 17 спрема 16 милиони, значи тие 17 одлучиле за 65 милиони жители“, нагласи тој.
„За разлика од Брегзит каде што граѓаните одлучуваа „за“ и „против“ кај нас се отвори можност за бојкот, пред сè поради неодлучноста на ВМРО-ДПМНЕ. Во втората анкета се покажа дека расте бројот на граѓани кои ќе бојкотираат, односно 29 посто“, рече Кржаловски.
Тој ги повика граѓаните да си го оствари правото на глас, без разлика како ќе се изјаснат.
„Веројатно ќе победи гласот „за“, меѓутоа не се знае дали ќе се постигне цензус“, додаде Кржаловски.
Текст и камера: Дехран Муратов
Монтажа и фотографија: Биљана Јордановска
Текстот е дел од проектот „Патриотизам ДА, национализам НЕ!“ што го спроведува ЦИВИЛ со поддршка од Цивика мобилитас. Содржината на овој текст е единствена одговорност на ЦИВИЛ и на ниту еден начин не може да се смета дека ги одразува гледиштата на Цивика мобилитас, Швајцарската агенција за развој и соработка (SDC) или организациите што ја спроведуваат.