Основниот суд во Велес, вчера, донесе ослободителна пресуда за двајцата осомничени во случајот „Ореше“. Според образложението на одлуката, заштитениот сведок, ниту бил заштитен, ниту загрозен, туку бил лажен сведок кој сведочел по налог на тајната полиција.
Томислав Кежаровски, беше жртва на спектакуларно апсење и политички прогон поради текст напишан во 2008 година, а среде новинарска истрага за сомнителната погибија на сопственикот и главен уредник на неделникот Фокус, Никола Младенов. Текстот за кој Кежаровски е апсен, осуден и затворен се однесува на наводно заштитен сведок, што во пресудата мистериозно се преквалификува во загрозен сведок, а не бил ни едното ни другото. Со вчерашната пресуда од Велешкиот суд, се докажуваат тврдењата на Кежаровски.
„Вчерашната одлука на Велешкиот суд како првостепен кривичен суд е трета по ред во којашто се донесува ослободителна пресуда. Во овој случај искрено се надевам дека ќе биде и последна ваква одлука и дека повисоките инстанци само ќе ја потврдат.
Ова е само уште еден доказ на сите мои укажувања дека не станува збор за апсолутно релевантен сведок, туку за некој којшто е под пресија на полициски службеници за да сведочи онака како што ним им одговара во целата таа постапка. Впрочем, за сè што се случувало околу неговата конструкција и неговото втурнување во случајот „Ореше“, јас пишував во тие два ‘спорни’ текстови во „Репортер 92“ во октомври и ноември 2008 година.
Ова е само уште еден доказ дека судиите ниту сакаа да ги уважат моите укажувања на тоа дека професионално ја работев работата и дека сè што е напишано во текстовите е вистина и само вистина. Ниту пак го уважија укажувањето на мојот адвокат дека апсолутно не станува збор за заштитен сведок, туку се работи за човек којшто нешто слушнал, некој којшто никој пат не бил под заштита на полицијата.
Ова е уште само еден доказ дека судиите коишто ме судеа во оној процес наречен „Ликвидација“, не можеби, туку сега веќе сигурен сум, и со право можам да речам дека судеа по нечија наредба, но тоа во ниту еден момент не ја намалува нивната одговорност“, вели Кежаровски.
Тој истакна дека ќе почека одлуката на Велешкиот суд да стане правосилна, а потоа ќе бара одговорност од судиите коишто го судеа во случајот „Ликвидација“.
„Мојата цел е да не се повторуваат и понатаму вакви случки. Во иднина да не им се суди на условно невини лица. Јас не целам кон материјална добивка. Мојата цел е да побарам од институциите, на оние коишто ме судеа да им биде одземено правото да се занимаат со правни работи. Затоа што, секако, судија може да погреши, меѓутоа, доколку тој намерно греши и работи по диктат, нему не му е местото во судот, во каква било судска институција, дури, би рекол, не му е местото да се занимава со правни работи“, истакна Кежаровски.
Маја Ивановска
Камера: Дехран Муратов
Фотографија: Биљана Јордановска