Лаги, дезинформации и говор на омраза упатени кон ХЕРА, ЛГБТИ заедницата и министерката Царовска

Извесен Горан Прзин на својот Фејсук профил сподели вознемирувачки обвинувања упатени кон невладината организација ХЕРА како и министерката за образование и наука, Мила Царовска. Во објавата пишува дека ХЕРА се залага за „Сексуализација и Педофилија на децата“. Во вознемирувачката содржина објавени се фотографии од интернет и линк од видео со наслов Трговија со фетуси под заклетва.

Објавата беше споделувана и во групи на Фејсбук, меѓу кои и групата „Македонски антиваксери“.

„Накратко, оваа организација преку сексуалното образование го промовира АБОРТУСОТ како нормална појава и всушност е КАСАПНИЦА за ФЕТУСИ и БЕБИЊА од чии делови, Planed Parenthood и ХЕРА прават огромен бизнис“, се вели во објавата на Горан Прзин (Goran Przin).

Во друг пост, по објавениот текст на Фронтлајн.мк, пишува: „Она што во постот не го спомнав е прашањето, КОЈ, КОГА И НА КОЈ ИЗБОРИ ГЛАСАЛ за ХЕРА или било кој нејзин член да бидит дел од ДРЖАВНИТЕ институции – ОБРАЗОВНИОТ СИТЕМ а со самото то и сексуален еукатор на нашите деца ?

Ало Влада и дпне опозиција на северната (вукојебина)! Од тука, во кое својство и со кој легитимитет ХЕРА си зела за право да нуди програми за ССО (сексуализација) на нашите деца?“.

Тој во друг пост шири говор на омраза кон ЛГБТИ заедницата.

За Горан Прзин нема никакви информации на Фејсбук, ниту дали и каде е вработен, какво образование има, бидејќи изнесува „експертски“ мислења во делот на сексуалната едукација во образованието. Единствен податок е дека е од Охрид и дека му се допаѓа „левичарската“ фејсбук страница „Црвена младина-Кавадарци“.

ЦИВИЛ Центар за слобода реагира дека говорот на омразата останува највидлива алатка за пресметка со прогресивните проекти и реформи. Институциите се повикани веднаш да реагираат соодветно на законот, а јавноста и медиумите решително да ги осудат и отфрлат ваквите појави. Неказнивоста мора да престане.

Д.М.