Членови и истакнати активисти и функционери на политичката партија Левица, со сите расположливи средства, вклучувајќи и пари и платени постови на Фејсбук, дезинформации и поттикнување на меѓуетничка омраза, се обидуваат да му наштетат на пописот. Односно, како што гласи една објава на социјалните мрежи од анонимен-бот профил, „Паѓа попис, паѓа Влада“. Ова јасно укажува дека бојкотот на пописот од страна на овие радикални националисти маскирани во „левичари“ не е од патриотски, туку од политички и националистички побуди.
„Левичарите“ преку Фејсбук групата „Не отварам врата“, преку фотомонтирана фотографија ги заплашуваат граѓаните да не се попишуваат, бидејќи така ќе учествуваат во „косоваризација на Македонија“.
Спонзориран, односно платен пост се појави на Фејсбук за кампања против пописот. Постот е платен од лицето Иван Јованоски. Ова име е идентично со името на функционерот на Левица од прилепскиот огранок, што му се закануваше на новинарот и активист Петрит Сарачини. На Фејсбук профилот на Јованоски кој го користи псевдонимот Announakey Jovanovsky, можат да се забалежат повеќе објави кои повикуваат на бојкот на пописот.
Во дел од објавите има и навреди и говор на омраза. Во еден пост објавен на Твитер кој го сподели Јована Мојсоска, исто така функционерка на Левица, покрај изнесените невистини, пишува и „Навистина ќе дозволите попис организиран од #Ш, Аљи и Груби“…
Ваквите лаги, дезинформации и заплашувања со „косоваризација“ на Македонија поттикнуваат меѓуетничка омраза, што е кривично дело според Кривичниот законик.
ЦИВИЛ повторно ги повикува институциите да реагираат на овие објави со говор на омраза. Можеби овие радикални структури мислат дека со овие дезинформации и омраза, кои претходно поминуваа кај граѓаните, ќе добијат ситни политички поени во пресрет на локалните избори. Но денес ваквите лаги и манипулации не поминуваат.
Пописот е статистичка операција, а не политичка битка за политичка добивка. Национализмот и омразата не носат добро за ниту еден граѓанин и граѓанка на Северна Македонија, без оглед на нивната политичка или етничка припадност.
Мониторинг тим на ЦИВИЛ
