Министрите за одбрана на Сирија и Либан се согласија на прекин на огнот во понеделникот, објави сириската државна новинска агенција САНА, по прекуграничните напади во кои загинаа 10 и повеќе од 50 беа ранети, пренесува Си-ен-ен.
Двајцата официјални претставници, исто така, се согласија да ја зајакнат координацијата и соработката меѓу нивните земји, според САНА.
Договорот следи по ескалацијата на тензиите меѓу Бејрут и новата сириска влада предводена од исламисти. Во изминатите два дена во прекугранични напади загинаа тројца Сиријци и седум Либанци, според двете влади, а 52 лица се ранети на либанска страна.
Во понеделникот, Сирија гранатираше либански села на границата, откако тројца Сиријци загинаа во северниот либански град Каср, според либанската војска, која соопшти дека нејзините сили одговориле на нападот.
Цел на сириското гранатирање беше и Каср, соопшти либанската државна новинска агенција.
Во неделата, сириското Министерство за одбрана ја обвини либанската група Хезболах, поддржана од Иран, дека киднапирала тројца сириски војници од сириска територија во заседа, објави државната новинска агенција САНА, велејќи дека тие биле „однесени на либанска територија и егзекутирани на лице место“.
Исто така, се вели дека еден фотограф и репортер биле повредени на сириско-либанската граница откако биле погодени од „ракетата на Хезболах“.
Либанската армија соопшти дека двајца Сиријци биле убиени на граница, а друг починал во болница, а трите тела и се предадени на Сирија.
Хезболах негираше вмешаност во граничните судири, објави либанската државна новинска агенција NNA, велејќи дека „нема врска со какви било настани што се случуваат на сириска територија“.
Д. Мишев
