Конференцијата за изборни реформи „Перспективите на македонските избори“ што ја организира ЦИВИЛ, ќе се одржи во Скопје, хотел Континентал (Кристална сала), на 25 септември со почеток во 12 часот. Тимот на ЦИВИЛ веќе започна со испраќање на поканите до лидерите на политичките партии, како и до други релевантни учеснички и учесници на Конференцијата.
На Конференцијата ќе се говори за потребата од реформи во изборниот систем во целост, а поконкретно ќе се отворат темите за Изборниот законик, изборниот модел, Избирачкиот список, политичкото финансирање и медиумите и изборите. Учесничките и учесниците на Конференцијата ќе се обидат да дадат одговори на прашањата дали, како и во кој временски рок се возможни реформи во изборниот систем.
На листата на поканети се наоѓаат голем број политички партии, без оглед на тоа дали се работи за голема или мала политичка партија, дали е застапена во сегашниот состав на Собранието или е вонпарламентарна. Од организацискиот тим на ЦИВИЛ велат дека некои контакти се застарени или повеќе не постојат и апелираат до политичките партии, доколку не добијат покана до понеделник на пладне, да се јават во организацијата, за да ги обноват податоците за контакти, за да добијат покана.
За сите заинтересирани за присуство и евентуално активно учество на Конференцијата, на располагање е и онлајн апликацијата што организацијата го објави на 29 август. Бројот на учесници е ограничен, а организацијата го задржува правото на селекција на учесничките и учесниците.
ЦИВИЛ ќе покани релевантни експерти и претставници на граѓанското општество и меѓународната заедница. Иако Програмата на Конференцијата ќе биде објавена на 18 септември, во овој момент е познато дека таа ќе биде поделена во четири сесии. Во првата сесија ќе се обратат претставникот на ЦИВИЛ и специјалните гости на Конференцијата, претставници на меѓународната заедница во земјава. Во втората сесија што ќе се одржи без пауза, во продолжение, ќе говорат лидерите на политичките партии. За излагањата на секој од лидерите се обезбедени седум минути.
Доколку лидерите на политичките партии не се во можност да учествуваат на Конференцијата, дозволено е тој/таа да назначи своја замена, но само за учество во третата сесија, со можност за презентација до три минути.
Во четвртата сесија ќе говорат експерти и претставници/претставнички на институциите, граѓанското општество и меѓународната заедница.
По сите излагања е терминот за дискусија, прашања и коментари од присутните, за кои е пожелно да се најават во апликацијата за учество, бидејќи тие ќе добијат предност. Конференцијата ќе заврши најдоцна во 16 часот, а во меѓувреме ќе има најмалку една кратка пауза.
Организаторите ќе обезбедат симултан превод од и на македонски, албански и англиски јазик. Излагањата и презентациите на учесничките и учесниците ќе бидат снимени и објавени во целост на медиумската платформа на ЦИВИЛ. Конференцијата ќе ја отвори германскиот амбасадор Томас Герберих.
Настанот е дел од проектот „Слободни граѓанки и граѓани за слободно општество“, финансиран од Министерството за надворешни работи на Сојузна Република Германија.
ЦИВИЛ Тим за комуникации
