Двајцата главни луѓе во американскиот Сенат – демократот Чак Шумер и републиканецот Мич Меконел побараа од Русија веднаш да го ослободи новинарот на Волстрит џурнал Еван Гершкович, додека руските државни медиуми објавија дека тој е формално обвинет за шпионажа.
Портпаролка на Стејт департментот одби да го коментира извештајот за формални обвиненија. Таа додаде: „Ние ќе продолжиме да притискаме за фер и транспарентен третман за сите граѓани на САД кога тие се предмет на правни процеси во странство“, пишува Волстрит џурнал.
Шумер и Меконел оценија дека „новинарството не е криминал“.
Ова е редок пример на изјава што заеднички ја потпишаа Демократската и Републиканската партија на САД, коментираат светските агенции.
Гершкович е првиот новинар кој е уапсен во Русија за наводна шпионажа од крајот на Студената војна, а САД бараат итно да се прекине неговиот, како што велат, „незаконски притвор“.
Силно го осудуваме неправедното притворање на американскиот државјанин и новинар на Волстрит џурнал Еван Гершкович и бараме овој меѓународно познат и почитуван независен новинар веднаш да биде ослободен, соопштија Шумер, како лидер на демократското мнозинство во Сенатот, и Меконел, лидер на републиканското малцинство во Сенатот.
Според нивните изјави, Гершкович бил акредитиран во руското Министерство за надворешни работи да работи како новинар во Русија, а „руските власти не презентирале никакви веродостојни докази за поддршка на нивните измислени обвинувања“.
Да бидеме многу јасни: Новинарството не е криминал, напишаа Шумер и Меконел. Тие, исто така, побараа Русија да ослободи уште еден уапсен Американец, Пол Вилан.
Според рускиот правен систем, поднесувањето формални обвиненија укажува дека е започната формална истрага за случајот. Тоа, исто така, укажува дека истражителите ќе почнат да собираат докази што ќе се користат во други потенцијални рочишта и судење по периодот на притвор, кој за Гершкович треба да трае до 29 мај.
Московскиот суд треба да ја разгледа жалбата од адвокатите на американскиот новинар на 18 април. Судот може да го потврди продолжувањето на притворот на Гершкович во московскиот затвор Лефортово, да нареди негово преместување во друг затвор, да му дозволи домашен притвор или да му одобри кауција.
Руското Министерство за надворешни работи во неодамнешно соопштение наведе дека обвиненијата против Гершкович се од сериозна природа и се тврди дека „тој бил фатен на дело додека се обидувал да добие доверливи информации, користејќи го неговиот новинарски статус како покритие за незаконски дејствија кои се квалификуваат како шпионажа“.
Според медиумите, Гершкович, дописник на „Волстрит џурнал“, кој претходно работел за АФП, е кривично гонет според член 276 од рускиот кривичен законик и му се заканува казна затвор од 20 години.
Г. Т.
