Британската влада има намера да го блокира новиот шкотски закон што ќе им олесни на трансродовите лица законски да им се признае полот. Акцијата поттикнува многу напорна дебата за правата на трансродовите лица и го проширува уставниот јаз, додека владата во Единбург води кампања за независност на Шкотска, пренесува Њу Јорк Тајмс.
Законот ќе овозможи на трансродовите лица во Шкотска да им се издава нов извод од матичната книга на родените без медицинска дијагноза и ќе ја олесни законската промена на нивниот пол. Според законската регулатива, луѓето на возраст од 16 години и постари може да аплицираат за сертификат за признавање на полот со законски изјаснување дека живеат во нивниот „стекнат“ пол и дека имаат намера да го прават тоа трајно.
Британската влада во Лондон тврди дека потегот на шкотскиот парламент го прекршува законодавството за еднаквост што се применува низ Велика Британија со тоа што им овозможува на луѓето различен третман во зависност од тоа каде живеат. Ова е првпат владата во Лондон да го отфрли шкотскиот парламент користејќи овластување од 25-годишен статут.
Првиот министер на Шкотска, Никола Старџен, ја опиша акцијата како „целосен фронтален напад врз нашиот демократски избран шкотски парламент“. Шкотската влада ќе го брани законодавството, рече таа.
Во Британија, дебатата за правата на трансродовите станува сè поспорна, со вклучување на истакнати личности, вклучувајќи ја и писателката Џ.К. Роулинг, протести против шкотското законодавство и други предлози за признавање на полот. Единствената клиника за млади трансродови лица во земјата беше затворена минатата година.
Подготви: Д. Мишев