Околу 60% од 300 мали и средни компании во Македонија, немаат воведено ниту една активност за родово балансиран менаџмент и не планираат да го направат тоа. Околу 14 отсто од нив, планираат такви активности во иднина, а само 26 отсто анкетирани фирми, веќе се обиделе да преземат една или повеќе активности за зголемување на родовата балансираност во менаџментот. Ова го покажуваат резултатите од истражувањето што во рамките на проектот „Еднаква моќ на жените“ го спроведе Институтот за комуникациски студии, во соработка со Институтот „Изида Вита“ од Словенија.
Родовата еднаквост во Македонија очигледно е отворено прашање во општествено-политички контекст, особено поради очигледната нееднаквост, почнувајќи од политичките структури и бизнис заедницата, па сè до концептот за еднакви права на мажите и жените во брачните заедници и семејството.
Анкетата дава одговори на 12 прашања, меѓу нив, и за причините за отстапувањата во областа на вработувањето на мажите и жените во Македонија, за тоа колку големите и средни компании во Македонија се свесни за овие факти, а ако се, кои мерки и активности ги преземаат за да ја исправат неправдата?
Според досегашните сознанија, 98% од анкетираните знаат што е родова еднаквост, 75% сметаат дека родовата балансираност е многу значајна, 2,6% сметаат дека тоа воопшто не е важно прашање… За приближно 65% испитаници, родовата еднаквост влијае врз етиката во компаниите. Исто толкав е процентот на фирми, што сметаат дека родовата балансираност влијае добро и врз креативните процеси во компанијата.
Инаку, финалните резултати од истражувањето ќе бидат објавени кон средината на јули.
