Европа и светот ги отворија вратите за Македонија. Седнуваме на големите маси, рамо до рамо со најсилните земји во светот, рамноправни, поддржани од нашите сојузници, порачаа поддржувачите на референдумот на вчерашните јавни настапи и на средбите со граѓаните.
Претседателот на СДСМ и премиер Зоран Заев синоќа од Крива Паланка посочи на поддршката што ја има и ја добива Македонија од целиот свет.
– Доаѓа цел свет да го потврди тоа што го правиме, тоа е европско однесување, да бидете горди и со Македонија и со иднината на Македонија, рече Заев и додаде дека денеска во Европскиот парламент во Стразбур ќе зборува за перспективите на Македонија, а земјата се уште не е членка на ЕУ.
Двајца високи американски гости, Вес Мичел и Џејмс Матис, доаѓаат во Македонија за да изразат јасна поддршка за претстојниот референдум и за стапувањето на Македонија во НАТО.
Во пресрет на денешната посета на Вес Мичел, помошник-државен секретар за Европа и Евроазија на Македонија, американскиот Стејт департментот изрази надеж за успех на референдумот и повторно укажа на историската важност на договорот од Преспа.
Во изјава за МИА портпарол на Стејт департментот посочи дека имплементацијата на Договорот со Грција ќе овозможи Македонија да стане членка на НАТО како Северна Македонија.
– Тоа ќе го олесни отварањето на преговорите за членство во ЕУ, од што корист ќе имаат двете земји а тоа е зацврстување на регионалната безбедност и поттикнување на развојот, се вели во соопштението до МИА.
Во Скопје за викендот доаѓа и државниот секретар за одбрана Џејмс Матис.
Високата претставничка за надворешни работи на ЕУ, Федерика Могерини денеска ќе престојува во Скопје, каде ќе одржи средби со македонскиот државен врв.
Целта на посетата, велат од кабинетот на Могерини, е да разговара за „иднината на односите и перспективата на интеграција во ЕУ за земјата“, јави дописничката МИА од Брисел.
Високата претставничка потсети дека го поздравува „историскиот договор“ постигнат со Грција за името и дека ЕУ ја поддржува земјата, согласно „зајакнатата заложба на ЕУ на Западниот Балкан“.
Министерката за одбрана Радмила Шекеринска изјави дека посетите на Македонија што во изминатиот период ги прават важни политички личности од НАТО и ЕУ е уште една потврда дека државата е насочена кон вистинскиот правец, поради што ја добива таквата поддршка.
– Во посета ни доаѓа првиот човек на Пентагон, првиот човек на најмоќната армија во светот Џејмс Матис, што се случува првпат во последните 14 години. Заборавивме како изгледа посета на министер или секретар за одбрана на САД, иако оваа држава е наш стратешки политички и воен партнер. Тоа покажува колку е голем интересот за нас и поддршката за она што ние го сработивме во последната година, додаде Шекеринска.
Покрај Матис, наредната недела во посета на Македонија ќе дојдат уште двајца министри за одбрана од земји членки на ЕУ за да дадат поддршка референдумот да успее.
Претседателот на Косово, Хашим Тачи за време на вчерашната посета на Скопје ги повика граѓаните на Република Македонија да учествуваат на референдумот и да гласаат „за“ затоа што, оцени, Македонија во НАТО значи мир во целиот регион, вклучувајќи го и Косово. За него, ова е историски момент што треба да се искористи.
И шефот на холандската дипломатија Штеф Блок по средбата со неговиот македонски колега Никола Димитров порача дека Холандија ја поддржува и перспективата за членство во ЕУ на Македонија.
– Нашата политика е строга но фер, кога земјата ќе ги исполни предусловите ќе го поддржиме пристапниот процес за ЕУ во јуни 2019 година, рече Блок.
Поддржувачите на референдумското „За“ вчера порачаа дека светот ги отворил вратите за нас и оти сега останува граѓаните на Македонија да одлучат дали таа шанса ќе ја искористат. (МИА)