ДРАГАН МИШЕВ
Прекрасно богата и слатка, со точно одмерена количина киселост, чорбата од кромид ѝ пркоси на скромната репутација на нејзината главна состојка… Кромидот. Тешко е да се замисли состојка што е полесно достапна, разновидна и поевтина. Скромен по изглед, и покрај неговите карактеристични вкусови, кромидот често не добива шанса да го привлече вниманието. Но, таков не е случајот и во македонската медиумска кујна.
Варијации на чорбата од кромид постоеле во Европа уште од античкиот римски и грчки период. Во гастрономијата денес најпознати се 2 вида на чорба од кромид, француската и унгарската. Меѓу гурманите се води полемика за тоа која од овие две е повкусна, иако разликите се во мали детали. Но, сега овие две кралици на чорбите добиваат огромна конкуренција во Македонската медиумска чорба од немиен кромид.
Главна карактеристика, а воедно и најочигледна разлика помеѓу оваа чорба и претходните две е што нашите медиумски готвачи користат исклучиво немиен кромид.
Творецот на рецептот и нарачателот на овој македонски медиумски специјалитет е (навидум) непознат. Главниот готвач се менува, во зависност од тоа каква гозба се подготвува. Да се биде најдобар главен готвач на Македонската медиумска чорба од немиен кромид очигледно е главен Фактор во фелата.
На немиениот кромид главниот готвач му додава екстра додатоци, го филува, аранжира и секако му подготвува мрсна запршка, така што на останатите помошници готвачи им останува само да ја сервираат и дистрибуираат по останатите медиумски мензи (Плусинфо, Вечер прес, 24 вести, Република, Фокус, Точка…), и секако да се најде на менијата на големите национални медиумски ресторани (Сител, Телма, Мелма…)
И помалите мензи, и националните ресторани не погледнаа во тенџерето дали состојките во него, обработката и подготовката се по ХАСАП/ФАЛАЛ. А нема ни зошто, токму таква беше нарачката, Македонска медиумска супа од немиен кромид. И тргнаа да ја послужуваат на своите консументи.
Но, вака подготвената чорба, кај поголемиот дел од консументите предизвика чувство на повраќање и дијареја. Но, (па и не е некое големо чудо), ниту готвачите и послужителите на супата не се извинија за проблемите што ги предизвикаа во дигестивниот тракт на консументите, ниту пак реагираа надлежните институции, здруженија и совети задолжени за „чистотата“ на послужените медиумски производи.
А и како би реагирале, кога нивните членови се ангажирани во овие кујни, било како главни готвачи, помошници готвачи, салатери, садомијачи, келнери…
На пример, медиумот на „бардот“ на македонското новинарство, координаторот на Регистарот на професионални онлајн медиуми – Промедиа, повеќе пати досега објавува лажни вести и дезинформации и манипулации, сè со цел да создаде анимозитет и недоверба на граѓаните кон институциите.
Или дежурниот долевач на масло (бензин, гас) на огнот, кој и покрај самопрогласените високи професионални вредности, без проверка пренесува лажни вести и дезинформации, со цел преку предизвиканото незадоволство кај народот, да ја примора Владата да ја наведе водата (бензинот, гасот) на воденицата на својот сопственик.
И сега, откако прво самите го лапнаа кромидот немиен, и истиот, доработен потоа им го сервираа на граѓаните, се поставува прашањето, за кои кујни одработуваат? Или во недостаток на закани со бомби во училиштата, побрзаа да шират несигурност и страв со новата големата лага за вооружениот грабеж во Скопјанка, кој доведе до паника во училиштата во близина на наводниот настан, и предизвика вознемиреност и стрес кај родителите кои побрзаа да си ги земат децата од настава.
Општ молк. Нема ни извинување, ниту од телевизиите со национална концесија ниту од електронските медиумите кои, сите по ред, по принцип на сврзани садови ја дезинформираа целокупната јавност .
Но поважно од ова секако е фактот е дека добивме уште еден доказ дека кај нас со лагите се управува од еден центар, а дека медиумите (сега не само оние со национална фреквенција, туку и другите) се обичен и слеп извршувач на чорбестите нарачки.
Како поинаку да се протолкува фактот дека никој не отиде навреме да ја провери вистинитоста на веста. А можеа тоа многу лесно да го сторат, требаше само да завртат на мобилните телефони на некој од портпаролите на МВР кои секогаш им стојат на располагање.
Текстот е личен став на Авторот.
