Повикот на ЦИВИЛ до своите членови, поддржувачи, соработници и сите заинтересирани граѓанки и граѓани да учествуваат во новата акција: Граѓански форум за учество во креирање на владините политики допре до голем број граѓанки и граѓани, активисти и поддржувачи на организацијата. На нашите електронски адреси веќе пристигнаа голем број пораки со артикулирани барања до идната влада, коишто се објавуваат на медиумската платформа на ЦИВИЛ.
Марина Новакоска пишува:
Имајќи ја во предвид актуелната состојба “COVID-19” во нашата земја како и во целиот свет покрај тоа што е погодена здравствената безбедност на граѓаните исто така во поголеми размери е погодена и економијата. Токму поради тоа сметам дека главен фокус на ново формираната Влада на Република Северна Македонија треба да биде развојот на економијата и подигнувањето на животниот стандард на граѓаните.
За таа цел потребна е цврста определба за поддршка на домашните претпријатија, пред сè на малите и средните претпријатија, кои ќе инвестираат и ќе отвораат работни места, а деловната клима да биде ослободена од политички притисоци и репресии. Понатаму, посебно внимание треба да се посвети на зголемувањето на вработеноста во економијата, преку активните мерки за вработување кои ќе се планираат годишно да вработат поголем број на лица во приватниот сектор.
Задолжителна обврска на Владата е да настојува да се подигне нивото на платите во економијата. Растот на платите треба да прави притисок продуктивноста во економијата да се зголемува, а напоредно да се обезбеди заштита на работничките права.
Развојот на економијата треба да обезбеди подигнување на животниот стандард на граѓаните, преку праведно распоредување на плодовите. Исто така, Владата треба да има за цел да вметне праведност во двата клучни механизми за редистрибуција во економијата – даночниот и социјалниот систем.Тоа би се одвивало во позитивна наскока само доколку промените во даноците и социјалните трансфери бидат воведувани паралелно со подобрувањето на ефикасноста на институциите.
Подобрување на ефикасноста на институциите ќе треба да биде во правец кон прикажување на целосна фискална транспарентност, со што ќе се овозможи јавноста да добие и јасна претстава за вистинската состојба на јавните финансии.
