Ни Дебар не е лишен од проблемот со складирање на отпадот. Депонијата e секојдневен проблем на жителите, посебно поради нејзината близина до градот. Негрижата на Општината и на Јавното комуналното претпријатие „Стандард“ ги доведува граѓаните секојдневно во ризик, ја загрозува животната средина и влијае врз загадувањето на воздухот.
„Проблемот со депонијата во Дебар е проблем што е активен последните 3-4 години, односно, од моментот кога Ружди Љата стана градоначалник. Како резултат на неговата неспособност и на вработените во Јавното комунално претпријатие ‘Стандард’… Искрено, овој проблем постои отсекогаш, но одеднаш, стана многу видлив поради меѓусебниот договор на градоначалникот со ЈКП ‘Стандард’ и сиот отпад од Ростуше го фрлаат во нашата депонија.“, изјави , за ЦИВИЛ Медиа Бардул Марку, екологист и поранешен претседател на еколошкото друштво „Деша“, Дебар.
Депонијата го загрозува и здравјето на дебарчани, затоа што се наоѓа во непосредна близина на градот, а според Марку, условите за живот на неколкуте сиромашни семејства што живеат во близина се во катастрофална состојба.
„Во депонијата се фрла бувално сè, од градежен шут, органски отпад од домаќинствата, индустриски отпад (од фабриката ‘Кнауф Радика’), опасен отпад од Медицинскиот центар во Дебар, остатоци од мртви животни, како и коски од касапниците. Депонијата нема ни чуварска служба, ни некој одговорен, барем преку ден да се грижи или да го порамнува фрленото ѓубре“, ни изјави Марку.
Марку истакна дека депонијата не е единствениот проблем во Дебар, но поради местоположбата, ниту еден од проблемите како да не е во интерес на надлежните органи.
Биљана Јордановска
