Илјадници граѓани денес излегоа на улиците во германскиот град Гисен, протестирајќи против формирањето на нова младинска организација на десничарската партија AfD. Демонстрациите започнаа во раните утрински часови, со блокади на 16 локации околу градот организирани од граѓанската платформа „Resist“.
Според Еуроњуз, протестите обединија различни движења и иницијативи – антирасистички групи, синдикати, студентски организации и активисти за човекови права. Присутни беа и членови на познатата група „Omas gegen Rechts“, како и поддржувачи кои носеа палестински знамиња и антисистемски пораки. Според организаторите, целта на протестот е да се спротивстават на „радикализацијата на младите“ и ширењето на екстремно-десничарски идеи.
Полициското присуство беше значително засилено. На неколку точки дојде до тензии, по што полицијата употреби пепер-спреј и водени топови за да ги расчисти блокадите. Дел од демонстрантите фрлаа камења, а полицијата пријави дека неколку службеници биле повредени.
Додека надвор траеја протестите, лидерите и делегатите на AfD пристигнаа на собирот под силно обезбедување. Новата младинска структура треба да го замени распуштениот огранок „Young Alternative“, кој минатата година беше укинат поради истраги за екстремистички активности.
Протестите во Гисен се дел од поширок тренд на масовни демонстрации ширум Германија против растечкото влијание на AfD и обидите на партијата да го прошири своето присуство меѓу младите. Граѓанските организации предупредуваат дека ваквите напори отвораат сериозни ризици за демократијата и за општествената кохезија.
Д. Т.
