Потпреседателот на Демократската унија за интеграција (ДУИ), воедно и пратеник во македонското Собрание Изет Меџити, еден од лидерите на незадоволната група во ДУИ, ја искритикува снимката на која партискиот лидер Али Ахмети пее во канцеларијата.
Според Меџити, тоа е обид за да се дефокусира мислењето од вистинскиот проблем и е „бесрамна злоупотреба на имиџот на Ахмети“
„Снимањето на Али Ахмет како пее и потоа објавувањето на истата снимка, за да се дефокусира мислењето од вистинскиот проблем, е бесрамна злоупотреба на неговиот имиџ…“, напиша Меџити во социјалните мрежи.
Според Меџити ДУИ мора да се ослободи од узурпаторите, платениците и неспособните.
„Снимањето на Али Ахмет и зачувувањето на овие видеа за користење кога ви одговара е неточно и се чини дека тоа не се случува првпат. ДУИ мора да се ослободи од узурпаторите, платениците и неспособните!“
Ова видео на Ахмети се толкува како реакција на средбата од пред неколку дена на оваа група со партиските активисти во Студеничане, во кој Меџити ги откри критиките на групата кон министрите од ДУИ во Владата.
Меџити на овој собир порача „Ахмети да не го пали јорганот за една болва„
Според него, актуелните министри од ДУИ не дошле со гласовите на граѓаните и поради нивните неуспеси ги исполнуваат условите да заминат.
„Ние сме со Али Ахмети, бевме и ќе останеме со Али Ахмети, но пораката од ова е пријателска – да не го палиме јорганот за една болва или за неколку болви“, изјави Изет Меџити, потпретседател на ДУИ.
Н. А.
