Голем број на медиуми деновиве објавуваат неофицијални информации за новозаболени и починати од КОВИД-19, кои не се соопштени од релевантните институции. И по објавувањето на таквите информации, медиумите не соопштуваат ни од каде ги добиваат истите.
Пред два месеци на ова реагираше ЦИВИЛ, кои со мониторингот бележи дека, за жал, лажните вести и дезинформации, како и говорот на омразата и стигматизацијата во медиумите, а особено на социјалните мрежи не стивнуваат во периодот на вонредните мерки за спречување на заразата од КОВИД-19. Медиумскиот простор е исполнет со различни видови содржини што, под плаштот на „објективно“ информирање, застапуваат сосема различни, па и спротивни интереси од тоа што се подразбира под јавен интерес.
ЦИВИЛ ги повика медиумите, пред да објават некоја вест поврзана со корона вирусот, добро да ја проверат информацијата и да објавуваат само точни и прецизни информации, бидејќи со секоја непроверена „ексклузивна“ информација дека починал или се заразил некој од корона вирус се причинува само штета и ги тревожи и така веќе загрижените граѓани.
„Постапките на одредени медиуми и политички структури, ЦИВИЛ ги оценува како крајно несериозни и опасни по јавното здравје, по напорите да се заштити јавниот интерес и да се спречи ширењето на заразата. Пандемијата мора да се сфати сериозно. Сега е време да покажат одговорност и кон себе и кон својата публика, но и кон сите граѓанки и граѓани на Република Северна Македонија.
Ова не е време за трка по „кликови“, сега е време за чесно, објективно и сериозно информирање на јавноста!
ЦИВИЛ ја повикува Владата и Министерството за здравство веднаш да реагираат на овие појави, и да се санкционираат оние „извори“ што даваат непотврдени и неточни информации на одредени медиуми, со цел да се спречи паниката за ширењето на корона вирусот“,стои во соопштението на ЦИВИЛ.
Денеска реагираше повторно и министерот за здравство Венко Филипче за ваквиот однос на некои медиуми кои објавуваат неофицијални, и како што истакна тој, речиси секогаш неточни информации за бројот на новозаболени од корона вирусот.
„Од самиот почеток на оваа криза лично јас и целиот мој тим за односи со медиуми сме ваш партнер. Веќе 100 дена навремено, прецизно и транспарентно ја известуваме јавноста. Ги соопштуваме сите детали за новозаболените од Ковид-19, се со цел медиумите да имаат точна информација. Уште еднаш ги замолувам медиумите да престанат да изнесуваат шпекулативни и непроверени информации околу бројот на заболени лица од Ковид-19. Ги молам да ја зачуваат својата улога и задача која ја имаат кон јавноста за навремено, точно и проверено известување“, истакна Филипче.