„Ни во минатото, ни сега, до Амбасадата на Република Белорусија во Белград и Н.Е. Амбасадорот Валериј Брилјев, ни во Почесниот конзулат на Република Белорусија во Скопје, не се доставени никакви жалби. Исто така, ниеден стопанственик што бил примен на разговор не се пожалил за никакви проблеми, од каква било природа и какви било размери.
Сакаме да посочиме, воедно и да потврдиме дека сѐ што беше искажано се едноставно лажни вести.
Во моментот, се подготвува Нота од страна на Амбасадата на Република Белорусија во Белград до Министерството за надворешни работи на Република Северна Македонија за погоре искажаните лажни вести”, се вели во соопштението од Почесниот конзулат на Република Белорусија во Скопје, демахтирајќи го Антонио Милошоски кој обвини дека во Кабинетот на премиерот Зоран Заев дошол белорускиот амбасадор за да разреши спор поврзан со рекет од 250.000 евра.
Како што тврдеше Милошоски на вчерашната собраниска седница, се работи за случај каде бизнисмен од Битола, познаник на амбасадорот, кој добил тендер да работи со РЕК Битола, му биле побарани 250 илјади евра за да ја добие работата. Премиерот целосно ги отфрли овие наводи велејќи дека собраниската говороница многу дрско се злоупотребува.
Реакции имаше и во јавноста, особено на социјалните мрежи, со оглед дека Милошоски и порано се користел со ваков вид на ширење дезинформации. 
„Па тој не знае другачие да размислува, верувам дека почнал и да верува во своите лаги. Милошоски не знае што е лага, а што вистина“, „Кога е топло времево, информацииве на Антонио се како мајонез, брзо се расипуваат“, „Ајдееееее Руските пранкери му јавиле на Антонио Милошоски за рекетот. Го лапнал кромидот“, беа дел од коментарите на Твитер.
Б. Јордановска
