Прекршувајќи ги постигнатите договори, вооружените сили на Руската Федерација продолжуваат со ракетни и бомбашки напади врз Мариупол, Волноваха и други украински градови, соопшти Министерството за надворешни работи денеска, 5 март.
Украинското МНР ја алармира светската јавност дека тековното гранатирање го оневозможува отворањето на хуманитарни коридори за безбедна евакуација на цивилите и испорака на лекови и прехранбени производи.
„Тврдењата на Министерството за одбрана на Руската Федерација за наводно создавање пречки од страна на украинските власти за заминување на жителите од опколените градови не се точни и се дезинформации за оправдување на криминалните дејствија на руската армија“, се вели во соопштението на МНР на Украина.
Исто така, украинската страна истакнува дека руската страна ги игнорира апелите на меѓународните хуманитарни организации, особено на Меѓународниот комитет на Црвениот крст, за прекин на огнот со цел да се создадат безбедни услови за заминување на цивили и повредени луѓе.
Украина предупредува дека постапките на Русија се грубо кршење на Женевските конвенции и се класифицирани како воено злосторство според Римскиот статут.
„Ја повикуваме меѓународната заедница – државите и меѓународните организации – веднаш да го осудат грубото кршење на договорите за отворање хуманитарни коридори од страна на Русија и да ја повикаат Москва да им нареди на руските трупи да прекинат со огнот“, повикува Украина.
„Украина, заедно со вклучените хуманитарни организации, е подготвена да го евакуира цивилното население веднаш штом се создадат безбедни услови за тоа“, уверува украинското МНР.
Според податоците на ОН, еден милион бегалци ја напуштија Украина за само една недела.
Во меѓувреме, низ целиот свет се одржуваат протести против руската воена агресија и убивањето цивили во Украина. И во Скопје ќе се одржи протест против воената агресија врз Украина, на плоштадот „Македонија“ со почеток во 14 часот.
ЦИВИЛ е првата организација во Северна Македонија и меѓу првите во светот што ја осуди руската воена агресија врз Украина. На 25 мај, меѓу другото, ЦИВИЛ објави:
„Војната што ја поведе Путин е војна и против човековите права и слободи на руските граѓанки и граѓани! Слободата и мирот во Украина значат слобода и мир за целиот свет! НЕ на Путин, НЕ на војната и ДА за слободата, демократијата и мирот! Барањата за мир се висок патриотски чин! Да се сопре воинствениот деспот во Кремлин!“
#ПоддршкаЗаУкраина
ЦИВИЛ на својата медиумска платформа редовно објавува релевантни, точни и навремени вести, анализи и колумни од самиот почеток, кога Путин нареди натрупување на воените сили на украинските граници.
