„Новата концепција за основно образование е најавувана неколку месеци наназад и истата се изработува преку еден максимално транспарентен процес, со, како што напоменавме бројни засегнати страни – ученици, наставници, граѓански здруженија, домашни и странски партнерски организации меѓу кои особено би ја издвоиле УНИЦЕФ“, велат од Министерство за образование и наука во изјава за ЦИВИЛ Медиа.
Според министерството концепцијата треба да направи трансформација на училиштата, да создаде училиште што ќе ги учи младите да учат, ќе овозможи замена на стариот пристап на фактографско учење и ќе ги поттикне младите да размислуваат критички, да решаваат проблеми со носење на одлуки врз база на анализи и факти.
„Концепцијата ќе значи нов образовен модел преку кој секое дете ќе го достигне својот полн потенцијал. Во тој образовен модел нема да има кратење на научни дисциплини. Напротив, сите предмети кои постоеја досега и натаму ќе се изучуваат, со тоа што идејата е дел од научните дисциплини да се интегрираат и понатаму едни со друго. Новото основно образование на ученикот ќе му даде целосна слика за одреден настан или тема, што се постигнува со интердисциплинарен и интегриран пристап, односно поврзување на информациите од повеќе предмети. Ваквиот пристап им овозможува на учениците полесно да ги поврзан наставните содржини со реалноста и да ја согледаат смислата на она што го учат“, велат од министерството.
Од МОН додаваат дека концептот е признат и докажан како успешен во многу земји во Европа, Америка и Австралија.
„На овој начин функционира наставниот план на ИБ програмата. Кај нас, нема да се воведува ИБ програма во едно или неколку училишта. Кај нас ќе се воведе системско решение кое ќе ги опфати сите училишта, наместо да биде привилегија само за одреден број училишта“, додаваат од министерството.
