Официјална Москва денеска соопшти дека нема да се меша во работата на мисијата на Организацијата за забрана на хемиско оружје (ОПЦВ), чии иследници во Сирија треба да истражат дали имало напад со хемиско оружје во градот Дума.
– Русија ја потврдува своја посветеност да се обезбеди непречена и безбедна работа на мисијата и нема да се меша во нивната работа, сооопшти Амбасадата на Русија во Хаг.
Во соопштението од Амбасадата се наведува дека нападите предводени од САД во текот на викендот врз три постројки во Сирија бил обид „да се поткопа кредибилитетот на мисијата“.
ОПЦВ денеска се состана на итна средба, на која расправа за нападот во Дума, јави АФП, повикувајќи се на дипломатски извори. Еден од изворите навел дека состанокот кој се држи зад затворени врати, тукушто почнал.
Претходно беа забележани амбасадорите на Велика Британија, Русија и Франција како пристигнуваат во седиштето на ОПЦВ во Хаг.
ОПЦВ има 192 членки, а претседавачот, амбасадорот на Бангладеш, шеик Мохамед Белал за денеска свика состанокот на Извршниот совет, во кој членуваат 41 држава „за да разговараат за наводната употреба на хемиско оружје” во Сирија.
Извор: МИА
