„Оружјето“ со кое е усмртен Алмир му е вратено на семејството на убиецот и истото е огласено за продажба.
Возилото е поправено и огласено за продажба, иако во записникот од Основното обвинителство во Куманово е наведено дека „Со потврда за привремено одземени предмети број 267/4389 од првопријавениот е одземено ПМВ марка Мерцедес, со регистарски број KU-0914-AD, со напомена дека истото му е оставено на чување во неговиот двор без притоа да смее да се врши било какви поправки на истото која потврда е прилог на пријавата“.
И покрај ваквата одлука на кумановското обвинителство, братот на обвинетиот Бобан Илиќ, Бојан Илиќ, на 3 февруари, објавил оглас на социјалните мрежи за продажба на мерцедесот.
Групата „Правда за Алмир“ најави протест за утре во 13 часот пред Основното јавно обвинителство. Протестот е продолжение на оној од пред еден месец кога граѓаните бараа да не се преквалификува делото.
И покрај ветувањата, на последните пратенички прашања, новиот јавен обвинител Јовевски изјавил дека одлуката била донесена во Јавното обвинителство, пред тој да биде именуван на сегашната позиција, па потоа преквалификацијата на предметот се гласала во Јавното Републичко Овинителство.
На минатиот протест организаторите изразија најостра осуда за обидот за преквалификација на кривичното дело УБИСТВО во кривично дело СООБРАЌАЈНА НЕСРЕЌА со смртни последици.
„Жалиме што јавната обвинителка во случајот не успеа да издржи до крај и подлегна на некакви притисоци, и побара мислење од Вишото јавно обвинителство. Не мислиме дека овој случај е за во Вишото јавно обвинителство или Обвинителството на РМ затоа што е едноставен случај што не бара научни докази за да се види дека се работи за класично убиство, и никако за друго кривично дело.
Бараме од Јавното обвинителство на Република Македонија, и од Јавните обвинители како носители на функции, стручно и совесно да ја вршат нивната функција и да одлучат како што предвидува правото и правдата, односно да не го преквалификуваат делото во случајот на убиството на Алмир. Во случајот, како што се гледа и од видео снимките, се работи за класично убиство, извршено со умисла.
Не сакаме и овој случај да биде еден од тие во коишто, по кој знае кој пат, ќе констатираме постоење на селективна правда. Не смееме да дозволиме делењето на правда да зависи од етничката припадност на обвинетиот, на жртвата или на други учесници во постапката. Се надеваме дека конечно правото во Република Македонија ќе профункционира, и дека ќе се почитуваат правните норми.
Се надеваме дека Јавното обвинителство на Република Македонија ќе ни даде трошка надеж, дека постои можност за „живот за сите” во Република Македонија!“, изјавија тогаш.
На 5 март е следното рочиште за овој случај.
М. Ивановска